Hałoŭnym śledčym upraŭleńniem Śledčaha kamiteta zavieršana rasśledavańnie kryminalnaj spravy ŭ dačynieńni da členaŭ arhanizavanaj hrupy, što vykrali ŭ hramadzian Respubliki Biełaruś bujnyja sumy hrošaj na padstavie ŭdziełu ŭ ździełkach pa kupli ałmazaŭ z Afryki, paviedamlajecca ŭ infarmacyi SK.
Rasśledavańnie kryminalnaj spravy ažyćciaŭlałasia ŭ ciesnym uzajemadziejańni z Hałoŭnym upraŭleńniem pa baraćbie z arhanizavanaj złačynnaściu i karupcyjaj Ministerstva ŭnutranych spraŭ.
Ustanoŭlena, što płan padmanu paciarpiełych i kradziažu ich hrošaj raspracavaŭ 51-hadovy žychar Hrodzienskaj vobłaści. Akramia jaho ŭ skład arhanizavanaj hrupy ŭvachodzili jašče dvoje mužčyn, 1976 i 1977 hadoŭ naradžeńnia.
Płan byŭ u tym, što dla patencyjnych pakupnikoŭ, jakija žadajuć nabyć kaštoŭnyja kamiani, stvaraŭsia vobraz ludziej, zdolnych akazać dapamohu ŭ nabyćci ałmazaŭ u krainach Afryki.
Dla hetaha iłžehandlary raspaŭsiudžvali niepraŭdzivyja źviestki ab najaŭnaści suviaziaŭ z asobami, jakija zajmajucca zdabyčaj i prodažam ałmazaŭ na afrykanskim kantyniencie.
Dla tych, chto sumniavaŭsia, ašukancy arhanizoŭvali pajezdki ŭ Namibiju i Uhandu, kab prademanstravać prapanavanyja kaštoŭnyja kamiani.
Paśla atrymańnia hrošaj členy arhanizavanaj hrupy, kab advieści ad siabie padazreńni i stvaryć bačnaść vykanańnia sa svajho boku ŭsich damoŭnych abaviazacielstvaŭ, abvinavačvali pakupnikoŭ u parušeńni damoŭlenaściej, dasiahnutych pamiž bakami. A ŭ adnym vypadku navat arhanizavali falšyvaje zatrymańnie adnaho z paciarpiełych pravaachoŭnymi orhanami Respubliki Uhanda i sprabavali atrymać ad žonki apošniaha hrošy za jaho vyzvaleńnie z «turmy».
Hetaja schiema vykarystoŭvałasia ašukancami z 2011 pa 2014 hod.
Pa kryminalnaj spravie vyjaŭlena 11 paciarpiełych. Ahulnaja suma naniesienaj škody ŭ ekvivalencie składaje bolš za 700 tysiač dalaraŭ ZŠA.
Usim udzielnikam arhanizavanaj hrupy pradjaŭlenaje abvinavačvańnie pa č. 4 art. 209 (machlarstva, ździejśnienaje ŭ asabliva bujnym pamiery) Kryminalnaha kodeksa Respubliki Biełaruś. Miera strymańnia ŭ dačynieńni da ich nie źmianiałasia - jany źmieščany pad vartu.
Kryminalnaja sprava pieradadziena prakuroru dla nakiravańnia ŭ sud.
Ciapier čytajuć
Kaardynatara pošukavaha atrada «Anioł» pasadzili za palityku2
Kamientary