Kamanda prezidenta RB čarhovy raz stała pieramožcam Kaladnaha turniru, u finale atrymaŭšy valavuju pieramohu nad finami. Ale usialakich sił i resursaŭ dla hetaha pryjšłosia prykłaści navat bolej, čym zvyčajna. Razvažańni pra heta — u mienš aptymistyčnym zapisie ab turniry, čym papiaredni.
Amatary ajčynnaha chakieja, u mianie dla vas drennyja naviny.
Učora byŭ kančatkova raźviejany apošni chakiejny mif: našy vieterany — samyja vieteranistyja ŭ śviecie, i nijakija vieterany ich nie pieravieteraniać… (dalej pa tekście).
Kamanda prezidenta praviała na 12-m Kaladnym turniry čatyry matčy. Zakinuła 26 šajbaŭ. 9 ź ich praviali dziejučyja i, miakka kažučy, nie samyja apošnija ŭ ČB chakieisty — Andrej Hlebaŭ, Viačasłaŭ Lisičkin, Aleh Šafarenka, Daniel Korsa (pra apošnija dva proźviščy ŭ rostery ŭžo naabmiarkoŭvalisia — i biez hetaha materyjału chopić).
9 — nie tak i šmat? Padymiem pratakoły matčaŭ. I vyśvietlim, što ŭ dvuch klučavych hulniach (sa Słavakijaj ŭ hrupie i Finlandyjaj u finale) zakidvali vyklučna vyšejzhadanyja hulcy. Vieteranam i amataram była pakinutaja Šviejcaryja (častkova) i AAE: u apošnim hrupavym matčy ź pieraličanych hulaŭ tolki Hlebaŭ. Heta značyć, finaŭ pieramahali mała što dziejsnyja, dyk jašče i adzin dzień adpačyłyja prafiesijanały. «My ž tut nie pakazuchaj zajmajemsia, a pracujem» (s)
I navat pry takim raskładzie — usiaho 2:1 u finale. I navat pry takim raskładzie pryjšłosia adyhryvacca (jak i sa słavakami). I kolkaść štrafnych chvilin taksama krasamoŭnaja: 2 na 10 sa Słavakijaj, 6 na 20 ź Finlandyjaj. Heta prytym, što vieterany sami pa sabie hulajuć u chakiej značna miakčejšy, čym profi, i 20 chvilin za matč — heta prosta nonsens.
Asabliva skrupuloznyja mohuć skazać, što i słavaki hetym razam sabrali narmalnuju bandu, pryčym taksama ź dziejučymi chakieistami. Tak, paru čałaviek sapraŭdy było.
Naprykład, najlepšy bambardzir kamandy i ŭsiaho turniru Marek Uram, nastralaŭ až 22 ački ŭ čatyroch matčach, jon rehularna vychodzić na lod. Ale, pa-pieršaje, jon hulaje ŭ druhim słavackim dyvizijonie, a nie ŭ Lizie čempijonaŭ, a pa-druhoje — jamu 41 hod, a nie 35. Šatanu taksama 41, a treciamu bambardziru słavakaŭ Janašu — i zusim 45.
Pahladzim na najlepšych hulcoŭ kamandy Finlandyi. Kapitan Toni Miakiacha — 40 hadoŭ, karjeru hulca zaviaršyŭ u 2013 hodzie. Aki Uusikartana - 38 hadoŭ, nie hulaje z 2014. Jary Karchanien - 40, pryčym apošni praf.siezon - 2005/06. Mika Piełtoła - 46 (!), Kańki na ćvik paviesiŭ ŭ 2009 hodzie.
Heta značyć što atrymlivajecca? Varta było finam i słavakam sabrać bolš-mienš surjoznyja vieteranskija zbornyja, jak biełarusam ich užo i nie abyhrać pa ŭsich praviłach? Dy i «nie pa ŭsich» ledź-ledź atrymoŭvajecca.
Padobna na toje, kali b u vieteranaŭ byŭ svoj čempijanat śvietu, z usimi dyvizijonami dy inš., to boŭtałasia b naša zbornaja tam, jak ciapierašniaja maładziožka — pamiž dyvizijonami, hulajučy na roŭnych maksimum sa šviejcarcami i niemcami.
Pradkazalna, ale ŭsio roŭna niejak sumna. Dzie vy, kaladnyja kazki?
Kamientary