Žychary Puchaviččyny pratestujuć suprać zavodu jadachimikataŭ, što źbirajecca budavać u rajonie filijał rasiejskaj firmy «Avhust-Bieł». Učora ministerskija čynoŭniki sprabavali ich uhavaryć. Repartaž z pasiołku Družny.
Filijał rasiejskaj firmy «Avhust-Bieł» pry padtrymcy dziaržaŭnaha kiraŭnictva źbirajecca budavać u Puchavickim rajonie zavodu pa vytvorčaści jadachimikataŭ. Žychary pasiołkaŭ Družny, Śvisłač, Rudziensk, Dukora praciahvajuć kazać rašučaje «nie».
3 krasavika. h.p Družny
Kala ŭniversamu «Centralny» na došcy abjavaŭ — źviestki ab časie praviadzieńnia infarmacyjnaj sustrečy miascovaha nasielnictva ź čynoŭnikami ŭsich zacikaŭlenych u budaŭnictvie zavodu ministerstvaŭ.
Jak paviedamiła mnie miascovaja žycharka Nastacsia Rysiaviec, abjavy źjavilisia dzieści paśla 12 hadzin. Da hetaha ž čas praviadzieńnia vahaŭsia ad 16.00 da 17.00, a to i adkładvaŭsia da nastupnaha dnia (źviestki raspaŭsiudžvalisia pryncypova ŭ vusnaj formie).
Ad centralnaha parku da aktavaj zali CEC-5 (aficyjnaje miesca sustrečy) — bolš za try kilametry. Pieššu iści tudy nichto nie planavaŭ. Pa słovach Aleny Butkoŭskaj, udzielnicy inicyjatyŭnaj hrupy pratestoŭcaŭ, kiraŭnictva CEC razam ź miascovymi ŭładami abiacali padvoz... Ale ŭ 15.00 nievialičkaja hrupa žančyn emacyjna raspaviadała, što pa sielektary CEC-5 pieradali pra admienu aŭtobusaŭ. Ludzi pačali łavić taksi...
Mianie padvioz miascovy žychar. Pa darozie dzialiŭsia dumkami nakont materyjału ŭ «Biełorusskoj nivie» ad 25.03.2008, sumna ŭzdychaŭ, pakazvajučy na aŭtobus z tryma pasažyrami ŭ salonie (maŭlaŭ, voś vam i dyrektyva № 3, voś vam i ekanomija)...
U faje aktavaj zali biaspłatna razdavalisia miascovyja «Puchavickija naviny», sprava ruchałasia da 16.00.
U rajonie 16.00 u aktavuju zalu ŭvarvałasia žančyna i paprasiła ŭsich prysutnych žurnalistaŭ zafiksavać nieparadki, što robiacca na ŭvachodzie. Milicyjanty nijak nie chacieli puskać ludziej na infarmacyjnaje pasiedžańnie. Zaježdžanaje «niama miescaŭ» i biessensoŭnaje marmytańnie na zapyt «Čamu pra heta nie dumali raniej?» nie dzivili (tut choć kroŭ nie puskali).
Ale narod abaronu prarvaŭ: chaj sabie i pryjdziecca ŭsiu sustreču stajać, chaj sabie i kryčać u śpinu: «Bolš Vy ŭ nas nie pracujecie»...
Delehacyja ad ministerstvaŭ, słužbaŭ, viedamstvaŭ była šmatlikaja. Pieraličvać usich pradstaŭnikoŭ nie ryzyknuŭ navat pieršy namieśnik staršyni abłvykankamu.
Prahučała papiaredžańnie nie pieratvarać pracoŭnuju naradu ŭ «jakiści mitynh» — i pačałosia...
Demahohija
Momanty zambiravańnia byli nadta adčuvalnymi, asabliva, kali paŭtorna prasłuchoŭvaješ dyktafonnyja zapisy.
Dyj i mnohija ŭstupki ŭsprymalisia jak čystaj vady abiacanki. Naprykład, nakont lakalnaha manitorynhu hramadzkaj dumki adnosna pabudovy chimzavoda —było prapanavana pravodzić jaho nie kožny miesiac, a štotydniova. Śmiešna.
Kazusy
Kali siarod zaprošanych ekspertaŭ prahučała proźvišča Miaśnikoviča, zala ažyviłasia i pačała apładziravać. A to. Michaił Miaśnikovič, staršynia Prezydyjumu Akademii navuk nieadnarazova rabiŭ zaklučeńni nakont niemetazhodnaści budaŭnictva zavoda. Ale, kali Miaśnikoviču dali słova, to vyśvietliłasia, što heta nie zusim jon, a sp.Leśnikovič, choć i taksama z Akademii Navuk. Toj nie razhubiŭsia, i, razumiejučy, jakoj budzie reakcyja aŭdytoryi, usio ž skazaŭ niešta kštałtu, try razy nie zhadžalisia, a na čaćvierty...
Anekdoty
Prezydyjumu, mabyć, nie vielma padabalisia rašučyja nastroi aŭdytoryi. Pačali šukać vinavatych. Znajšli. To ž Zianon. Paźniak.
Tady taksama Sajuz razvalvali, na płoščy stajali, «Razvału!», a paśla Zianon vyjšaŭ — i prapaŭ SSSR...
Heta pavinna być śmiešna.
Vyśviatleńnie realnych prablemaŭ
Jak stała zrazumieła z vystupu dziaržaŭnaha ekalahičnaha eksperta Andrejeva A. A, zavod na asnovie kampanentaŭ niebiełaruskaj vytvorčaści budzie vyrablać šeść vidaŭ preparataŭ. Sp.Andrejeŭ raskazvaŭ pra toje, što zvykłyja ŭhnajeńni na našych ziamielnych učastkach majuć treciuju klasu niebiaśpieki, pra toje, što vyznačyć klasu niebiaśpieki adkidaŭ ad vytvorčaści preparataŭ možna budzie tolki tady, kali hetyja adkidy buduć atrymanyja, pra toje, što spalvańnie adkidaŭ — nie zusim pravilna kazać. Bolš navukova — termičnaja apracoŭka A ŭsio, što budzie zastavacca paśla termičnaje apracoŭki hetych palimeraŭ, budzie pakavacca i advozicca... na Homielščynu.
Ludzi aburalisia, što na 25 tysiač čałaviek adna Śvisłackaja balnica, a jašče chimzavod chočuć stavić.
Darečy, jaho budaŭnictva ŭžo pačałosia, chacia da hetaj pary niamy aktu ziemleadvodu.
Valancina Kačan, hałaŭny sanitarny ŭrač krainy, adznačyła vysoki intelekt miascovych žycharoŭ. Časam zdavałasia, što Kanstytucyju RB i Kanvencyju AAN jany viedajuć ledź nie na pamiać. Kali stareńkaja babulka kaža prezydyjumu, što babula jana dla svaich unukaŭ, a dla astatnich jana Lidzija Paŭłaŭna, heta śviedčyć pra mnohaje. Prynamsi, ludziam chočacca, kab pavažali ich hramadzianskuju pazycyju i pierastali ličyć bydłam. Patrabavańnie miascovaha referendumu, jakoje prahučała na schodzie — heta surjozna.
Kamientary