Źnižeńnie koštu šenhienskich vizaŭ dla biełarusaŭ mahło b uspryniacca jak uchvaleńnie ŭradu Biełarusi, jaki padvysiŭ košt svaich vizaŭ dla hramadzian Eŭraźviazu.
Takuju dumku vykazaŭ «Svabodzie» deputat Eŭraparlamentu z hrupy Eŭrapiejskaj narodnaj partyi Vitaŭtas Łandźbierhis. Pry hetym jon nia zmoh zhadać, ci padpisvaŭ jon sam deklaracyju ab nieabchodnaści pamianšeńnia koštu viz dla biełarusaŭ, jakuju raspracavali deputaty‑sacyjalisty. Tym nia mieniej da samoj ich inicyjatyvy jon pastaviŭsia skieptyčna:
«Hetaja źjava krychu z haliny pijaru, tym bolš u kantekście taho, što Łukašenka vielmi padvysiŭ košt vizaŭ u Biełaruś. Faktyčna jon nie zacikaŭleny ŭ hetym i robić učynki, što źjaŭlajucca vyklikam… Na pieršy pohlad: čamu b nie, davajcie, kaniešnie, źnizim, ale heta nia budzie zroblena. Sacyjalisty chacieli siabie dobra pakazać, viedajučy, što z hetaha ničoha nia budzie».
Na dumku spadara Łandźbierhisa, navat kali byli b sabranyja nieabchodnyja podpisy dla deklaracyi Eŭraparlamentu, rašeńnie buduć prymać inšyja orhany Eŭraźviazu.
Ź inšaha boku, spadar Łandźbierhis zaznačyŭ, što Biełaruś zastajecca ŭ centry ŭvahi Eŭraparlamentu.
