«Sakretnyja manieŭry», što pradprymajucca spačatku Ałžyram, a ciapier i Kataram, uviančalisia pahadnieńniem pra zamarozku zdabyčy nafty na ŭzroŭni studzienia 2016 hoda pamiž Rasijaj i Saudaŭskaj Aravijaj. Krynicy ahienctva adznačajuć, što pieršaja za vosiem miesiacaŭ sustreča tet-a-tet ministraŭ enierhietyki dźviuch najbujniejšych suśvietnych vytvorcaŭ faktyčna spyniła baraćbu za doli na rynku nafty.
«Źjaŭleńnie čaŭnakovaj dypłamatyi pakazvaje, jak naftavy kryzis zbližaje krainy, niazhodnyja pa cełym šerahu inšych pytańniaŭ. Ad Maskvy i Er-Ryjada da Karakasa i Osła — ściskańnie dachodaŭ adčuvalna ŭsiudy, i heta pavyšaje vierahodnaść «vialikaj ździełki», jakaja vychodzić za miežy pytańniaŭ nafty i jakaja zakranaje takija palityčnyja pytańni, jak vajny ŭ Siryi i Jemienie», — piša Bloomberg.
Usia ŭvaha ciapier pieraklučajecca na vyzvaleny ad amierykanskich sankcyj i hatovy da vychadu na rynak enierharesursaŭ Iran — mnohaje zaležyć ad taho, ci paśleduje Tehieran prykładu krain APIEK i Rasii i zamarozić abjomy zdabyčy nafty.
Partał adznačaje, što kartelu ŭžo ŭdavałasia prakrucić padobny truk — u 1999 hodzie krainy APIEK sfarmavali «adziny front» i zmahli razharnuć sychodny trend na rynku nafty, paśla čaho ceny vyraśli ź dziesiaci da sta saraka dalaraŭ za baral. Tady šakujučamu rynak rašeńniu ab zamarozcy zdabyčy papiaredničali doŭhija tajemnyja pieramovy ŭ haściničnych luksach i ŭ pasolskich rezidencyjach ad Majami da Haahi.
«Kali kartelu ŭdasca paŭtaryć pośpiech, śviet nie daviedajecca pra heta da apošniaj chviliny. <…> I kali Vieniesueła, Siryja, Iran, Rasija i inšyja klučavyja eksparciory byli ŭciahnutyja ŭ surjoznuju dyskusiju, historyja kaža nam pra toje, što ŭsio heta adbyvałasia ŭ tajamnicy», - pryvodzić Bloomberg Business słovy dyrektara Centra hłabalnaj enierhietyki Kałumbijskaha univiersiteta Džejsana Bordafa.
