Šumčanka bolš nie patrabuje admieny ŭkazu № 222, ale prosić «amnistyju» na ŭviezienyja tavary
Pieramovy ipešnikaŭ z čynoŭnikami, zdajecca, zrušylisia ź miortvaj kropki. Prynamsi, IP užo nie patrabujuć admieny ŭkazu № 222, a pradstaŭniki ŭłady iduć na pasłableńni. U aŭtorak u Minekanomiki prajšło čarhovaje pasiadžeńnie rabočaj hrupy pa pytańniach pracy indyvidualnych pradprymalnikaŭ.
Na sustrečy ź IP pradstaŭniki MPZ anansavali niekalki novaŭviadzieńniaŭ, jakija možna ŭ niejkaj stupieni nazvać sastupkami. Pieršaja «navinka» paraduje tych ipešnikaŭ, u jakich niekalki handlovych miescaŭ na adnym rynku. Takim handlaram paabiacali, što jany zmohuć pieramiaščać tavary ŭnutry adnaho handlovaha centra abo rynku, jaki znachodzicca pa adnym adrasie, a taksama pamiž handlovymi abjektami adnaho ŭłaśnika biez afarmleńnia tavarnych i tavarna-transpartnych nakładnych.
Jašče adzin ślizki momant tyčycca situacyj, kali kontrahient dziaržavy, na terytoryi jakoha IP kupiŭ tavary, admaŭlajecca paćvierdzić fakt prodažu. Pa apoviedach pradprymalnikaŭ, takija vypadki — daloka nie redkaść u adnosinach z rasijskimi pradaŭcami. Dyk voś ich pakazańni nie buduć ličycca «biezumoŭnym dokazam faktu adsutnaści ździełki».
«Pry praviadzieńni padatkovymi orhanami pravierak subjekt, jaki praviarajecca pryznajecca sumlenna vykonvajučym zakanadaŭstva, pakul nie budzie dakazana inšaje z ulikam kompleksnaha vyvučeńnia ŭsich abstavinaŭ ździajśnieńnia ździełak z tavaram», - udakładnili ŭ Minekanomiki.
«Pradstaŭniki MPZ skazali na pasiadžeńni, što admova rasijskich subjektaŭ haspadarańnia paćvierdzić ździełku nie budzie padstavaj dla kanfiskacyi tavaraŭ. Pry hetym MPZ nie admaŭlajecca ad pravierak, — padzialiŭsia vynikami sustrečy lidar hramadskaha abjadnańnia «Pierśpiektyva» Anatol Šumčanka. — Ja prapanavaŭ MPZ zakryć spravu połackich pradprymalnikaŭ, razbory suprać jakich byli zasnavanyja mienavita na pakazańniach rasijskaha partniora. Da taho ž, my patrabujem, kab MPZ raspracavała dakładny ałharytm — jak adroźnić pradaŭca ŭ Rasii».
Nahadajem, u śniežni padatkovaja raspaviała ipešnikam, jakija zakuplajuć tavar u Rasii, jak adroźnić dobrasumlennych pradaŭcoŭ ad «nielehalnych».
Miarkujučy pa ŭsim, ipešniki źmirylisia z tym, što słavuty ŭkaz №222 nie budzie skasavany. Praŭda, śpis patrabavańniaŭ da ŭładaŭ u ich usio roŭna majecca. U jaho ŭvachodzić prapanova spraścić paćvierdžańnie nabyćcia drobnych partyj tavaraŭ i ŭviadzieńnie «amnistyi» za parušeńni ŭ dakumientach na tavary, nabytyja ŭ pramiežku z 1 lipienia 2014 hoda pa 1 studzienia hetaha hoda, adznačyli ŭ Minekanomiki.
Ułady paabiacali razhledzieć hetyja pytańni na nastupnaj sustrečy ŭ Minekanomiki, jakaja zapłanavana na 24 lutaha.
«Da hetaha času ŭdzielniki rabočaj hrupy pavinny zrabić peŭnaje chatniaje zadańnie - narychtavać šerah prapanoŭ i ich abhruntavańnie, kab my išli dalej, - raspavioŭ staršynia prezidyuma Respublikanskaj kanfiederacyi pradprymalnictva Uładzimir Karahin. — Pieramovy niaprosta iduć, ale ŭsio-tki paetapna pačynajem raźbiracca. I čynoŭniki stali lepš razumieć prablemy, i pradprymalniki pačali lepš tłumačyć svaje prapanovy».
Akramia taho, čatyry viedamstvy — Dziaržstandart, Minhandlu, Ministerstva achovy zdaroŭja i Minsielhascharč — da 26 lutaha pavinny spraścić dla ipešnikaŭ praceduru paćviardžeńnia dakumientaŭ ab jakaści i biaśpieki tavaraŭ pry ich roźničnym prodažy. Jak abiacajuć ułady, IP dosyć pakazać praviaralščykam supravadžalnyja dakumienty, u jakich budzie infarmacyja ab jakaści tavaru.
«Kali pieramovy ni da čaho nie pryviaduć, to zastaniecca šlach praviadzieńnia masavych akcyj pratestu», - kaža Anatol Šumčanka. Ale da hetaha, na dumku lidera «Pierśpiektyvy», treba razhledzieć usie inšyja varyjanty, u tym liku vyjści na ŭzrovień premjer-ministra.
Nahadajem, u paniadziełak, 15 lutaha, u Minsku adbyłasia akcyja pradprymalnikaŭ, na jakoj sabrałasia niekalki socień čałaviek.
Kamientary