Słužba biaśpieki Ukrainy vypravadziła za miežy krainy rasiejskuju žurnalistku Maryju Stalarovu, jakaja pracavała na ŭkrainskim telekanale «Inter». Pra heta paviedamiła pres-sakratar Słužby biaśpieki Alena Hitlanskaja u svaim fejsbuku.
Stalarova akazałasia ŭ centry skandału paśla taho, jak padčas siužetu, pryśviečanaha zahinułym na Majdanie ludziam, z matam pierapyniła dyjałoh karespandenta sa svajakami zabitych aktyvistaŭ.
Pa słovach Hitlanskaj, pierad vysyłkaj z krainy sa Stalarovaj praviali śledčyja dziejańni. Akramia frazy ŭ efiry śpiecsłužby zacikavili jaje vizity ŭ zonu ŭzbrojenaha kanfliktu ŭ Danbasie ŭ 2014 hodzie.
Pa vynikach dopytu SBU vyrašyła skaracić Stalarovaj dazvoleny termin znachodžańnia va Ukrainie za dziejańni, jakija nanosiać škodu intaresam krainy. Akramia taho, ujezd na terytoryju Ukrainy joj zabaronieny na nastupnyja piać hadoŭ.
Fraza Stalarovaj aburyła mnohich žycharoŭ Ukrainy. Jana paśla patłumačyła, što słovy adrasavalisia nie karespandentu, a kamandzie ŭ studyi. Adnak mnohija joj nie pavieryli.
U pryvatnaści, daradca kiraŭnika MUS Ukrainy Zoran Škirak apublikavaŭ fatahrafiju žurnalistki siarod uzbrojenych bajevikoŭ «DNR».
Akramia taho, błohiery vyśvietlili, što da pracaŭładkavańnia va Ukrainie žurnalistka pracavała na rasijskim telekanale RIEN, asudžała toje, što adbyvajecca na Majdanie i padtrymlivała anieksiju Kryma.
Kamientary