Statkievič i Šumčanka zaklikali pradprymalnikaŭ vykazać 14 sakavika kalektyŭnuju niazhodu 

Staršynia RHA «Pierśpiektyva» Anatol Šumčanka i były palitviazień, eks-kandydat u prezidenty Mikałaj Statkievič zaklikali pradprymalnikaŭ vykazać 14 sakavika kalektyŭnuju niazhodu z normami ŭkaza №222. Z adpaviednym zvarotam jany vystupili paśla taho, jak stała viadoma pra zabaronu Minharvykankama na praviadzieńnie 14 sakavika akcyi «Marš pradprymalnikaŭ».

«Niahledziačy na toje, što nami atrymanaja admova na praviadzieńnie mitynhu i šeścia 14 sakavika, zajaŭlajem pra svoj ćviordy namier praciahnuć dziejańni, nakiravanyja na abaronu intaresaŭ i pravoŭ pradprymalnikaŭ. Našy dalejšyja dziejańni buduć nasić zakonny i lehalny charaktar», — havorycca ŭ zvarocie.

«U jakaści pieršaha kroku» Šumčanka i Statkievič prapanujuć pradprymalnikam pryjści 14 sakavika a 13.00 da Ministerstva pa padatkach i zborach, kab zrabić vusnuju abo piśmovuju zajavu pra svaju niazhodu z normami ŭkaza 222 ab rehulavańni pradprymalnickaj dziejnaści. «Mienavita MPZ źjaŭlajecca asnoŭnym raspracoŭščykam ukaza i na siońniašni dzień zajmaje najbolš žorstkuju i nieprymirymuju pazicyju ŭ ramkach dziejnaści rabočaj hrupy pry Ministerstvie ekanomiki, admoviŭšysia ad usich prapanavanych kampramisnych varyjantaŭ pa vyrašeńni prablemnych pytańniaŭ pradprymalnikaŭ», — adznačajecca ŭ zvarocie.

Jaho aŭtary padkreślivajuć, što dziejańni pradprymalnikaŭ «pavinny być ćviordymi i salidarnymi, bo ad hetaha budzie zaležać mahčymaść dalejšaj pracy małoha biźniesu ŭ Biełarusi».

Zajaŭka na praviadzieńnie 14 sakavika ŭ Minsku «Maršu pradprymalnikaŭ» była padadziena Šumčanka i Statkievičam u harvykankam 23 lutaha. U adkazie za podpisam namieśnika staršyni Minharvykankama Ihara Karpienki skazana, što jana nie adpaviadaje patrabavańniam zakona ab masavych mierapryjemstvach i rašeńni staličnych uładaŭ ab vyznačeńni miescaŭ dla praviadzieńnia masavych mierapryjemstvaŭ. Karpienka adznačaje, što ŭ parušeńnie zakona da atrymańnia dazvołu nieadnarazova abjaŭlalisia miesca i čas praviadzieńnia akcyi. Akramia taho, miesca zboru nie ŭvachodzić u pieralik dazvolenych, nie paznačana krynica finansavańnia mierapryjemstva. Jašče adna pryčyna admovy: «inšymi asobami» była padadziena zajaŭka na praviadzieńnie inšaj akcyi ŭ hety čas pa hetych ža maršrutach (ad Akademii navuk da płoščy Banhałor).

«Inšymi asobami» u dadzienym vypadku byli pradstaŭniki Abjadnanaj hramadzianskaj partyi (AHP), jakija padali zajaŭku na praviadzieńnie 14 sakavika «Sacyjalnaha maršu za hodnaje žyćcio». Pamiž arhanizatarami dźviuch akcyj razhareŭsia skandał, vynikam jakoha stała rašeńnie AHP adklikać svaju zajaŭku. Rašeńnie było pryniata 3 sakavika, a adkaz ź Minharvykankama datavany 1 sakavika.

U kamientary da admovy Minharvykankama sankcyjanavać vuličnuju akcyju Šumčanka abvinavaciŭ va ŭsim Labiedźku, jaki, na dumku lidara «Pierśpiektyvy», padaŭ zajaŭku naŭmysna. Sam Labiedźka zajaviŭ, što nie źbiraŭsia nikomu stavić pałki ŭ koły, a chacieŭ pryciahnuć da pratestu pradstaŭnikoŭ inšych prafiesij.

• 0
• 0
• 0
• 0
• 0
• 0
• 0
• 0