Krama symbal.by vypuściła na 8 sakavika cukierki ŭ abhortcy ź «Vieršnicaj» — «žanočaj» versijaj hierbu «Pahonia», prydumanaj paetam i muzykam Alesiem Płotkam (pieršy eskiz vykanała Liza Pastušenka). Raniej padobnuju akcyju krama ładziła na 23 lutaha, kali prezentavała cukierki ŭ abhortcy z «Pahoniaj».
Jak i ŭ minuły raz, pad abhortkaj — zvyčajnyja «seryjnyja» cukierki, «Alonka» fabryki «Kamunarka», apaviadaje Svabodzie kiraŭnik kramy Pavał Biełavus: «Zakrucili ŭ inšuju abhortku, rabili ŭručnuju, ničoha składanaha tut niama. Heta inicyjatyva dziaŭčyny, jakaja ŭ nas handluje. U nas tak mała dobrych pačućciaŭ apošnim časam, tamu niama ničoha drennaha ŭ tym, kab u hety dzień nadahać žančynam, što jany pryhožyja i što ich lubiać.
Dumaju, što ŭ Biełarusi nichto nie adznačaje 8 Sakavika jak śviata kamunizmu ci feminizmu. Heta dzień, kali žančyn vinšujuć i dorać im kvietki. Nia treba być zaciatymi kanservatarami, jakija nie ŭsprymajuć nijakich śviataŭ, akramia 25 sakavika i Dnia vajskovaj słavy.
Treba žyć u tym asiarodździ, što skłałasia, i pryvučać jaho da biełaruskich kaštoŭnaściaŭ. Možna pieraasensoŭvać takija śviaty, jak 8 sakavika, — i dadavać u ich nacyjanalny kantekst».
Na Dzień Voli 25 sakavika Pavał Biełavus źbirajecca častavać cukierkami z «Pahoniaj» i «Vieršnicaj» udzielnikaŭ śviata.
Raniej na 25 sakavika Biełavus z paplečnikami planavali zładzić muzyčny festyval u Pałacy sportu, ale ŭłady nie dazvolili jaho pravodzić praz uciečku etylenhlikolu.