U dačynieńni da vaśmi ŭdzielnikaŭ akcyi ŭ padtrymku Nadziei Saŭčanka, jakaja prachodzić 9 sakavika la pasolstva Rasii ŭ Miensku, składzienyja pratakoły ab administracyjnym pravaparušeńni. Jany abvinavačvajucca ŭ praviadzieńni niesankcyjanavanaha masavaha mierapryjemstva.
Jak paviedamiła ŭdzielnica akcyi Volha Nikałajčyk, supracoŭniki Centralnaha RUUS Minska składali pratakoły na praciahu 50 chvilin. U vyniku pratakoły składzienyja ŭ adnosinach jaje samoj, Maksima Viniarskaha, Leanida Kułakova, Aleksy Klimienki, Sieržuka Śmirnova, Aleny Cieraškovaj, Aleha Hajeŭskaha i Dźmitryja Zachareviča.
Padčas składańnia pratakołaŭ udzielniki akcyi zaŭvažyli pryparkavanyja kala bližejšych da pasolstva damoŭ milicejskija aŭtamabili dla pieravozki zatrymanych i mikraaŭtobus z taniravanym škłom, adnak paśla zaviaršeńnia pracedury milicejskuju techniku adahnali.
Pa słovach Nikałajčyk, dziejańni supracoŭnikaŭ milicyi nie paŭpłyvali na płany udzielnikaŭ akcyi zastavacca la pasolstva da 18.00. Kab paźbiehnuć pieraachaładžeńnia, hramadskija aktyvisty pastajanna źmianiajuć adzin adnaho.
Pikiet kala ambasady RF pačaŭsia siońnia ŭ 11.00 — u hety čas u Daniecku (Rastoŭskaja vobłaść RF) pačaŭsia sud nad ukrainskaj lotčycaj. U pikavy momant kala pasolstva naličvałasia 14 čałaviek. Na pačatku akcyi za padziejami nazirali supracoŭniki milicyi ŭ cyvilnym, u tym liku namieśnik načalnika milicyi hramadskaj biaśpieki HUUS Minharvykankama Maksim Hryščanka. Z pasolstva da pikietoŭcaŭ nichto nie vychodziŭ.
