ES nie varta było admianiać sankcyi suprać aficyjnaha Minska, bo biełaruskaja ŭłada pajšła na niedastatkovyja sastupki. Pra heta zajaviŭ u kamientary TUT.BY były kiraŭnik MZS Čechii Kareł Švarcenbierh.
— Ja vialiki skieptyk, ja b addaŭ pieravahu raŭnaznačnamu abmienu. Adna sastupka ŭ abmien na adnu sastupku. Tak, Minsk vyzvaliŭ palitviaźniaŭ, ale hetaha vielmi mała. Admianiać za heta ŭsie sankcyi niapravilna.
Siońnia Švarcenbierh udzielničaje ŭ vialikaj kanfierencyi pa śmiarotnym pakarańni ŭ Minsku. Češski palityk — aktyŭny prychilnik admieny hetaha vidu pakarańnia. Apošni raz jon naviedvaŭ Biełaruś jakraz dla ŭdziełu ŭ Tydni suprać śmiarotnaha pakarańnia ŭ 2014 hodzie.
— Tady ŭ nas taksama było šmat nadziej, što śmiarotnaje pakarańnie admieniać. Ciapier, što mianie šakavała, na nastupny dzień paśla admieny sankcyj u Biełarusi vynieśli śmiarotny prysud.
9 sakavika Kareł Švarcenbierh sustreŭsia ŭ Minsku sa svajakami asudžanych da śmiarotnaha pakarańnia. Na sustreču pryjechali rodnyja Siarhieja Chmialeŭskaha i Hienadzia Jakavickaha, asudžanych u 2016 hodzie da vyklučnaj miery pakarańnia. Taksama na sustrečy prysutničali pasoł Čechii ŭ Biełarusi, pravaabaroncy i maci Uładzisłava Kavalova, jaki byŭ rasstralany ŭ 2012 hodzie, paviedamlaje BiełaPAN.
Na dumku Švarcenbierha, pra takija spravy pravaabaroncy pavinny paviedamlać zamiežnaj presie jašče da vyniasieńnia prysudu.
— Na žal, pakul pra heta praktyčna nie pišuć. I navat ja, kali byŭ staršynioj kamiteta pa zamiežnych spravach u parłamiencie, pozna pra heta daviedvajusia, — ličyć parłamientaryj.
Švarcenbierh ličyć, što aficyjny Minsk hatovy pajści na sastupki ŭ pytańni maratoryja ci admieny śmiarotnaha pakarańnia:
— Viadoma, što ciapier u Biełarusi składanaja finansavaja situacyja, tamu niekatoryja zruchi ŭ śfiery pravoŭ čałavieka mahčymyja.
Adnak, pa pryznańni Švarcenbierha, zaraz hałovy jeŭrapiejskich palitykaŭ bolš zaniatyja pytańniami, źviazanymi z kanfliktami ŭ Siryi i Ukrainie. Aproč inšaha, pavodle słoŭ parłamientaryja, ciapier pryjšło novaje pakaleńnie palitykaŭ, dla jakich prablemy, źviazanyja z pravami čałavieka, adychodziać na druhi płan.
Kamientary