Śpiecyjalny pradstaŭnik Jeŭrasajuza pa pravach čałavieka Staŭras Łambrynidzis spadziajecca, što Biełaruś najbližejšym časam apyniecca ŭ liku krain, jakija ŭviali maratoryj abo zusim admovilisia ad prymianieńnia vyklučnaj miery pakarańnia.
Łambrynidzis vystupiŭ 10 sakavika ŭ Minsku na mižnarodnaj kanfierencyi pa pytańniach śmiarotnaha pakarańnia ŭ Biełarusi. Mierapryjemstva arhanizavanaje pradstaŭnictvam AAN u Biełarusi pry finansavaj padtrymcy pasolstva Vialikabrytanii. Siarod udzielnikaŭ mierapryjemstva — śpiecdakładčyk Parłamienckaj asamblei Rady Jeŭropy pa situacyi ŭ Biełarusi Andrea Ryhoni, staršynia kamiteta pa zamiežnych spravach Pałaty deputataŭ Čechii Karał Švarcenbierh, pasoł Vialikabrytanii ŭ Biełarusi Fijona Hib, pradstaŭnik PRAAN u Biełarusi Sanaka Samarasincha i šerah zamiežnych ekśpiertaŭ.
«Na siońnia bolšaść krain u śviecie ŭžo admianili śmiarotnaje pakarańnie, — zajaviŭ Łambrynidzis. — Pahladzicie na ličby: u 1965 hodzie takich dziaržaŭ było 9, u 1978-m — 16, u 2016 hodzie ich bolš za 150. Adnak pa-raniejšamu aktualnym pytańniem zastajecca, čamu Biełaruś prymianiaje śmiarotnuju karu. Bo astatnija 28 krain u Jeŭropie admovilisia ad vyklučnaj miery pakarańnia».
Na dumku śpiecpradstaŭnika ES, u pytańni admieny śmiarotnaha pakarańnia nie moža być palityčnych ci kulturnych asablivaściaŭ, na jakija spasyłajucca niekatoryja prychilniki vyklučnaj miery pakarańnia. Jon pryvioŭ u prykład ZŠA i Iran — šmat u čym roznyja krainy, ale pakarańnie śmierciu prymianiajecca i tam, i tam.
Łambrynidzis taksama zakranuŭ pytańnie hramadskaj dumki: «Mnie viadoma, što ŭ 1996 hodzie ŭ Biełarusi prajšoŭ refierendum pa pytańni śmiarotnaha pakarańnia, bolšaść vykazałasia suprać admieny hetaha vidu pakarańnia.
Ale varta mieć na ŭvazie, što na toj momant jašče nie było pažyćciovaha źniavoleńnia, a maksimalnym terminam pakarańnia było 15 hadoŭ pazbaŭleńnia voli (ciapier 25 hadoŭ). Situacyja źmianiłasia».
Śpiecpradstaŭnik ES źviarnuŭ uvahu, što ŭ šmatlikich jeŭrapiejskich krainach bolšaść nasielnictva taksama vykazvałasia za zachavańnie śmiarotnaha pakarańnia, adnak vyšejšaje kiraŭnictva prajaviła palityčnuju volu.
«Ja razumieju hnieŭ ludziej, jakija kažuć, jakoha jašče pakarańnia zasłuhoŭvaje toj, chto zabiŭ abo zhvałciŭ maleńkaje dzicia. Dobra, pakiniem pytańnie hodnaści złačynca. Ale ja chaču spytać, što ž z našaj hodnaściu? Ja nie dazvolu zabojcu pieratvaryć mianie ŭ zabojcu. Abaviazacielstva cyvilizavanych krain — być vyšej za pomstu i pryncyp «voka za voka», — ličyć Łambrynidzis.
Miž tym namieśnik ministra zamiežnych spraŭ Biełarusi Valancin Rybakoŭ zajaviŭ na kanfierencyi, što bolšaść nasielnictva krainy pa-raniejšamu padtrymlivaje zachavańnie śmiarotnaha pakarańnia. «Jak usim nam dobra viadoma, bolšaść biełaruskich hramadzian na refierendumie 1996 hoda vykazałasia za zachavańnie śmiarotnaha pakarańnia. I nieadnarazovyja sacyjałahičnyja apytańni, jakija pravodzilisia, śviedčać pra toje, što śmiarotnaje pakarańnie pa-raniejšamu pa-roznamu ŭsprymajecca ŭ hramadstvie i pa-raniejšamu majecca bolšaść prychilnikaŭ jaho zachavańnia. Nami hety fakt ihnaravacca nie moža i nie budzie, u tym liku i ŭ kantekście našaha dyjałohu z našymi vielmišanoŭnymi jeŭrapiejskimi partniorami», — skazaŭ Rybakoŭ.
Kamientary