Arhanizatary muzyčnych uznaharod Experty.by abvieścili śpis 12 naminantaŭ vośmaj štohadovaj premii lepšym biełaruskim albomam pa mierkavańni biełaruskich i zamiežnych muzyčnych žurnalistaŭ. Cyrymonija ŭručeńnia adbudziecca 16 sakavika pry padtrymcy internet-apieratara «Atłant Telekam».
U liku sioletnich naminantaŭ raznastajnyja pradstaŭniki sučasnaj biełaruskaj muzyčnaj sceny. Bolš za ŭsio rokieraŭ: ad hrandaŭ u asobie «Krambambuli» da bolš maładych Re1ikt, Super Besse, NABR i Teleport. Akramia taho ŭ śpisie jość indzi-hurty «Sieriebrianaja svad́ba», «Kaśsiopieja» i Hamlet His Highness, fołk-kamandy Shuma, Kazalpin i Irdorath, a taksama aŭtar-vykanaŭca Palina Respublika.
– Hod byŭ vielmi bahatym na jakasnyja relizy – usie vartyja ŭvahi pracy navat tearetyčna nie mahli źmiaścicca ŭ naminanty. Dastatkova pryhadać albomy Brutto, Źmitra Vajciuškieviča, Nizkiz, «J:mors», Neuro Dubel i šmat kaho jašče. Ale takaja kankurencyja idzie tolki na karyść biełaruskaj muzycy, – ličyć kiraŭnik prajekta Experty.by Źmicier Biezkaravajny.
Druhi hod zapar naminanty nazvanyja adzinym śpisam, biez zhadki nazvaŭ i kolkaści naminacyj, u jakich jany zajaŭlenyja. Aznajomicca ź imi dapamoža admysłovaja składanka, na jakuju patrapiła pa adnym treku z kožnaha naminavanaha alboma. U hałasavańni brali ŭdzieł 15 biełaruskich muzyčnych žurnalistaŭ, 5 zamiežnych, a taksama aktyŭnyja karystalniki sajta Experty.by. Ankiety ŭsich siabraŭ žury buduć apublikavanyja paśla ŭznaharod.
Pieramožcy ŭ 10 naminacyjach buduć abvieščanyja 16 sakavika na admysłovaj cyrymonii. Uładalnik uznaharody ŭ naminacyi «Albom hoda» atrymaje hałoŭny pryz – rekłamna-infarmacyjnuju padtrymku solnaha kancerta ad internet-apieratara «Atłant Telekam». U minułyja hady siarod pieramožcaŭ uznaharod byli Port Mone, Pukstband, «Troica», «Sieriebrianaja svad́ba», Źmicier Vajciuškievič, The Toobes, «Lapis Trubieckoj» i inšyja artysty.
Śpis naminanavanych albomaŭ z mahčymaściu prasłuchoŭvańnia – experty.by
Kamientary