Ukrainskaja vajennasłužačaja Nadzieja Saŭčanka spyniła suchuju haładoŭku, jakuju abviaściła ŭ znak pratestu padčas sudovaha pracesu ŭ Rasii. Takoje rašeńnie jana pryniała pa prośbie Piatra Parašenki, paviedamili jaje advakaty.
Ukrainskaja lotčyca Nadzieja Saŭčanka spyniła suchuju haładoŭku, jakuju jana abviaściła 3 sakavika, kali sud pieranios jaje vystup z apošnim słovam na pracesie pa spravie ab zabojstvie supracoŭnikaŭ VHTRK u Danbasie. Pra heta havorycca ŭ jaje liście, jaki pieršaj apublikavała partyja «Baćkaŭščyna» ŭ svaich akaŭntach u Twitter i Facebook.
Infarmacyju ab spynieńni haładoŭki paćvierdziŭ advakat Saŭčanki Mikałaj Połazaŭ.
«Dziakuj Bohu, Nadzia Saŭčanka spyniła suchuju haładoŭku. Na jaje rašeńnie paŭpłyvała prośba Piatra Parašenki i ŭsich, chto jaje padtrymaŭ», — napisaŭ jon u tvitary.
Inšy advakat Saŭčanki Mark Fiejhin skazaŭ TASS, što «Nadzieja spyniła suchuju haładoŭku i pačała prymać ježu». Jon taksama padkreśliŭ, što jana spyniła haładoŭku «pa prośbie prezidenta Ukrainy».
Napiaredadni Saŭčanka vystupiła ŭ sudzie z apošnim słovam. Tady jana paabiacała praciahnuć suchuju haładoŭku.
«Ciapier u suda jość tolki tydzień na vyniasieńnie rašeńnia. Chočacie pakazać svaju siłu, pakazvajcie, ale pamiatajcie, što my hrajem na majo žyćcio. Staŭka vysokaja, i mnie niama čaho hublać», — zajaviła ŭ sudzie Saŭčanka.
Prysud budzie abvieščany 21—22 sakavika. Prakuratura zapatrabavała 23 hady źniavoleńnia.
Kamientary