Minharvykankam zaćvierdziŭ akcyju, zapłanavanuju na 25 Sakavika, adnak prapanavaŭ arhanizataram źmianić jaje farmat.
Pra rašeńnie ŭładaŭ stała viadoma 18 sakavika padčas naviedvańnia harvykankama zajaŭnikami akcyi. Jak paviedamiŭ adzin z zajaŭnikaŭ, namieśnik staršyni Partyi BNF Ryhor Kastusioŭ, zbor udzielnikaŭ akcyi prapanavana pravieści na placoŭcy kala kinateatra «Kastryčnik», šeście — da parku Družby Narodaŭ, i tam ža — mitynh.
Akramia taho, harvykankam vyklučyŭ sa składu zajaŭnikaŭ akcyi čatyroch čałaviek — staršyniu Partyi BNF Alaksieja Janukieviča, byłoha palitviaźnia Mikałaja Statkieviča, lidara ruchu salidarnaści «Razam» Viačasłava Siŭčyka i staršyniu Abjadnanaj hramadzianskaj partyi Anatola Labiedźku — na padstavie taho, što jany na praciahu hoda nieadnarazova pryciahvalisia da administracyjnaj adkaznaści za ŭdzieł u niesankcyjanavanych mierapryjemstvach.
Arhkamitet pa praviadzieńni vuličnaj akcyi z nahody Dnia Voli ličyć pravakacyjnym rašeńnie Minharvykankama źmianić farmat akcyi, paviedamiŭ adzin z zajaŭnikaŭ akcyi, sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski na pres-kanfierencyi 18 sakavika.
«Heta pravakacyja z boku čynoŭnikaŭ harvykankama i milicyi. Apošnija paŭhoda pakazali, što akcyi ŭ centry horada nijakaj pahrozy hramadskamu paradku nie niasuć», — skazaŭ Rymašeŭski.
Jon zaklikaŭ hramadzian sabracca 25 sakavika z 18.00 da 18.30 na placoŭcy kala kinateatra «Kastryčnik», što dazvolena Minharvykankamam. «Tam my i vyrašym, ci varta iści pa prapanavanym uładami maršrucie», — zajaviŭ palityk.
Adzin z členaŭ arhkamiteta, eks-palitviazień Mikałaj Statkievič ličyć, što ŭłada ŭ čarhovy raz pakazała svoj antynacyjanalny charaktar. Palityk adznačyŭ, što jon sam, a taksama inšyja žychary i hości stalicy dumajuć pa-inšamu i zachočuć vykazać padziaku baćkam-zasnavalnikam BNR i inšym dziejačam nacyjanalnaha adradžeńnia.
Statkievič paviedamiŭ, što ŭ 17 hadzin 25 sakavika kala pomnika paetu Janku Kupału ŭ adnajmiennym skviery adbudziecca ŭskładańnie kvietak. Paśla hetaj cyrymonii, pavodle jaho słoŭ, hramadzianie projduć da kinateatra «Kastryčnik».
Jašče adzin člen arhkamiteta, staršynia Abjadnanaj hramadzianskaj partyi Anatol Labiedźka adznačyŭ pazityŭny momant rašeńnia harvykankama, a mienavita najaŭnaść dazvolenaha miesca zboru ŭdzielnikaŭ. «Heta aznačaje, što ludzi mohuć svabodna źbiracca i tam abmierkavać, što rabić dalej», — skazaŭ jon.
Člen arhkamiteta, staršynia Partyi BNF Alaksiej Janukievič zajaviŭ, što rašeńnie ab tym, ci prytrymlivacca prapanavanaha ŭładami maršrutu, budzie prymacca sumiesna ŭsim arhkamitetam. Pry hetym jon ličyć, što prajści pa vulicy Surhanava — «heta narmalna, hodna». Janukievič padkreśliŭ, što zaklikać ludziej źbiracca dla ŭdziełu ŭ mitynhu ŭ parku Družby Narodaŭ kala płoščy Banhałor arhkamitet nie budzie.
***
Zajaŭka na praviadzieńnie šeścia i mitynhu z nahody Dnia Voli była padadzienaja ŭ Minharvykankam 3 sakavika. Zbor udzielnikaŭ akcyi płanavaŭsia kala Akademii navuk, a šeście — pa praśpiekcie Niezaležnaści da parku Janki Kupały, dzie pavinien byŭ prajści mitynh. Arhanizatary zajaŭlali, što, źmianiŭšy farmat praviadzieńnia vuličnaj akcyi z nahody Dnia Voli (u apošnija hady šeście tradycyjna pravodziłasia pa vulicy Surhanava da płoščy Banhałor), jany chacieli pratestavać hatoŭnaść uładaŭ da dyjałohu ŭnutry krainy.
