Partyja BNF zaklikaje ŭrad abmiežavać patok mihrantaŭ u Biełaruś ź Siryi. Adpaviednaja zajava pryniata 19 sakavika na sojmie arhanizacyi ŭ Minsku.
U dakumiencie adznačajecca, što za čas vajny ŭ Siryi ŭ Biełaruś prybyło bolš za 300 biežancaŭ z hetaj krainy. «Urad Biełarusi viadzie intensiŭnyja pieramovy z Upraŭleńniem viarchoŭnaha kamisara AAN pa spravach biežancaŭ u kirunku pavieličeńnia patoku pieramiaščeńnia asob siryjskaha pachodžańnia, jakim pradastaŭlajecca žycharstva ŭ Biełarusi, — havorycca ŭ im. — Adnačasova prymajucca zakanadaŭčyja zachady ŭ kirunku spraščeńnia atrymańnia statusu biežanca i prystanišča ŭ Biełarusi. Niahledziačy na toje što kolkaść pryniatych mihrantaŭ pakul nievialikaja, stvorany precedent i rychtujecca pravavaja baza dla pieramiaščeńnia ŭ Biełaruś vialikich hrup ź Siryi».
Taksama partyja adznačaje, što bolšaść mihrantaŭ ź Siryi prybyvaje ŭ Biełaruś z terytoryi tych krain, dzie dla ich užo niama pahrozy dla žyćcia i biaśpieki. Adznačajecca pry hetym, što Biełaruś prymaje vialikuju kolkaść biežancaŭ z Ukrainy.
Partyja BNF ličyć, što demahrafičny kryzis u Biełarusi, vyjezd za miažu na pracu vialikaj kolkaści suajčyńnikaŭ, a taksama «nie da kanca sfarmiravanaja nacyjanalnaja samaśviadomaść» biełarusaŭ ź`iaŭlajucca faktarami, pry jakich «niedapuščalnaje masavaje pryniaćcie ekanamičnych mihrantaŭ ź inšaha cyvilizacyjnaha koła».
Partyja BNF patrabuje spynić «praktyku zaprašeńnia ŭ krainu mihrantaŭ, jakija nie majuć realnaj nieabchodnaści ŭ prytułku i pieraraźmiarkoŭvajucca ŭ Biełaruś z krain, dzie nie majuć pahroz svajoj asabistaj biaśpiecy».
Partyja BNF ličyć metazhodnym, kab urad nakiroŭvaŭ biudžetnyja srodki na zaachvočvańnie viartańnia suajčyńnikaŭ z-za miažy. Arhanizacyja prapanoŭvaje raspracavać i pryniać zakon «Ab paśviedčańni (karcie) suajčyńnika», jaki ź`iaŭlajecca sposabam abarony pravoŭ takich asob, a taksama sadziejničaje pracesu viartańnia ich na radzimu, jak heta robiać Polšča i Vienhryja.
Kamientary