Biełarusy, jakija paciarpieli ŭ Brusieli — heta siamja, što stała žyvie ŭ Bielhii
Troje biełarusaŭ znachodzilisia la stojki rehistracyi, kali prahrymieŭ vybuch u aeraporcie Brusiela. Pra heta paviedamlaje telekanał ANTsa spasyłkaj na pasolstva Biełarusi ŭ Bielhii.
«Hetaja siamja pastajanna pražyvaje ŭ Bielhii i źbirałasia lacieć u ZŠA. Jany sami pakinuli budynak aeraporta i paźniej źviarnulisia pa miedycynskuju dapamohu ŭ adnu z klinik Brusiela», — prahučała ŭ efiry.
Pavodle dadzienych pieršaha sakratara pa konsulskich pytańniach pasolstva Biełarusi ŭ Bielhii Ryhora Aksionava, 22 sakavika ŭ adnu z klinik Brusiela źviarnulisia troje hramadzian Biełarusi. «Heta siamja, jakaja asabista pryjšła na miedycynskaje abśledavańnie. U baćkoŭ dyjahnastavanaja baratraŭma vucha. U dziciaci — parez miakkich tkanin. U vyniku baćkam pryznačany kurs lačeńnia. Dziciaci nakładzienaje švo. Im prapanavanaje paŭtornaje abśledavańnie praź dziesiać dzion», — udakładniŭ jon.
Pavodle infarmacyi, ahučanaj telekanałam, troje hramadzian Biełarusi byli zastrachavanyja. «Strachavy polis pakryje ŭsie ich finansavyja vydatki. Padčas vybuchu ŭ aeraporcie hramadzianie Biełarusi znachodzilisia pobač sa stojkaj rehistracyi na vylet. Na biahučy momant ich zdaroŭju ničoha nie pahražaje. Ciapier jany znachodziacca ŭ siabie doma», — adznačałasia ŭ efiry.
Kamientary