Vital Šaviejka vyzvaleny ad kryminalnaj adkaznaści, jaho źmieściać u psichijatryčnuju bolnicu, adkul mohuć vyzvalić u luby momant.
Jon byŭ aryštavany ŭ studzieni 2008 hoda pa padazreńni ŭ zabojstvie siamihadovaj druhakłaśnicy Białaruckaj siaredniaj škoły Iryny Kuželnaj i abvinavačvaŭsia na padstavie č. 1 art. 169 (raspusnyja dziejańni), č. 3 art. 166 (zhvałtavańnie) i p. 2 č. 2 art. 139 (zabojstva zaviedama małaletniaha) Kryminalnaha kodeksa Respubliki Biełaruś.
Jak paviedamili BiełaPAN u Minskim abłasnym sudzie, V. Šaviejka vyzvaleny ad kryminalnaj adkaznaści. Da jaho buduć prymienieny miery biaśpieki i lačeńnia ŭ vyhladzie źmiaščeńnia ŭ psichijatryčnuju balnicu sa strohim nazirańniem. Sudom ustanoŭlena datyčnaść minčanina da złačynstvaŭ, što inkryminavalisia jamu.
Termin utrymańnia ŭ psichijatryčnaj balnicy sudom nie ŭstanaŭlivajecca. Jak patłumačyli BiełaPAN u Minskim abłasnym sudzie, kiraŭnictva lačebnaj ustanovy moža nakiroŭvać u sud pastanovy ab jaho vyzvaleńni, kali paličyć, što jon nie ŭjaŭlaje hramadskaj niebiaśpieki. Miesca ŭtrymańnia takich asob vyznačaje Ministerstva achovy zdaroŭja.
Nahadajem, materyjały spravy ŭ dačynieńni da V. Šaviejki byli pieradadzieny ŭ Minski abłasny sud z prakuratury Minskaj vobłaści ŭ pačatku krasavika. U kancy lutaha psichołaha‑psichijatryčnaja ekśpiertyza, jakaja pravodziłasia ŭ Respublikanskaj kliničnaj psichijatryčnaj balnicy «Navinki» (Minsk), pryznała ŭ 29‑hadovaha minčanina stan biesśviadomaści.
Abvinavačańnie va ŭčynieńni zabojstva V. Šaviejku było vystaŭlena 11 studzienia — da vysnoŭ ekśpiertyzy. Z sankcyi prakuratury jon byŭ aryštavany.
Cieła druhakłaśnicy Białaruckaj siaredniaj škoły (Łahojski rajon Minskaj vobłaści) było znojdziena supracoŭnikami kryminalnaha vyšuku 3 studzienia pad budaŭničym vahončykam kala lasnoha masivu na adlehłaści prykładna siami kiłamietraŭ ad pasiołka Białaručy, dzie dziaŭčynka žyła z maci, i dvuch kiłamietraŭ ad sadavodstva «Lasnoje‑90». Ustanoŭlena, što śmierć dziaŭčynki nastupiła ŭ vyniku nasilnych dziejańniaŭ. I. Kuželnaja znachodziłasia ŭ vyšuku z 23 listapada 2007 hoda.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary