Sud Savieckaha rajona Minska 23 krasavika abaviazaŭ zajaŭnikaŭ Jeŭrapiejskaha maršu vypłacić 2,1 młn. rubloŭ na karyść UP «Harramaŭtadar Minharvykankama».
Vuličnaja akcyja apazicyi «Jeŭrapiejski marš» adbyłasia ŭ Minsku 14 kastryčnika 2007 hoda.
25 lutaha 2008 hoda sud pravioŭ pieršaje pasiadžeńnie pa isku UP «Harramaŭtadar Minharvykankama». Pradpryjemstva zapatrabavała ad zajaŭnikaŭ Jeŭrapiejskaha maršu kampiensavać zatraty na ŭborku vulic stalicy paśla akcyi ŭ pamiery 2 młn. 135 tys. 974 rubloŭ.
23 krasavika sud svaim rašeńniem poŭnaściu zadavoliŭ patrabavańni istca i pastanaviŭ spahnać patrabujemuju sumu salidarna z zajaŭnikaŭ — lidera ruchu «Za Svabodu» Alaksandra Milinkieviča, namieśnikaŭ staršyni Partyi BNF Viktara Ivaškieviča i Vincuka Viačorki, lidera Abjadnanaj hramadzianskaj partyi Anatola Labiedźki i maładziožnych lideraŭ Źmitra Chviedaruka i Jaŭhiena Afnahiela.
«Padčas sudovaha razhladu nie prahučała nivodnaha dokazu taho, što «Harramaŭtadar» panios dadatkovyja raschody pa ŭborcy i vyvazie śmiećcia», — zajaviŭ BiełaPAN A.Labiedźka.
Pavodle jaho słoŭ, rašeńnie suda «stvaraje niebiaśpiečny precedent». «Ułada radykalizuje častku hramadstva. Ciapier prosta hublajecca sens sprabavać u pravavym poli realizavać kanstytucyjnyja pravy hramadzian na praviadzieńnie masavych mierapryjemstvaŭ. Ludzi pierastanuć źviartacca da ŭładaŭ pa dazvoł na praviadzieńnie vuličnych akcyj, nichto nie budzie brać adkaznaść za ich praviadzieńnie. Jak vynik, akcyi buduć bolš radykalnymi», — ličyć palityk.
A.Labiedźka paviedamiŭ, što takija iski zajaŭnikam vuličnych akcyj pradjavili jašče siem arhanizacyj Minska.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary