Siejm Polščy pryniaŭ źmieny zakona ab Karcie palaka (dakumient, jaki vydajecca hramadzianam SND i krain Bałtyi i paćviardžaje prynaležnaść da polskaha narodu), jakija praduhledžvajuć spraščeńnie pracedury atrymańnia polskaha hramadzianstva dla ŭładalnikaŭ hetaha dakumienta. Polskija deputaty pryniali papraŭki da zakona, padrychtavanyja siejmavaj kamisijaj pa suviaziach z palakami za miažoj, adnahałosna.
PAP
Pa słovach kiraŭnika kamisii, deputata kirujučaj partyi «Prava i Spraviadlivaść» Michała Dvorčyka, zakon zaklikany dapamahčy asobam polskaha pachodžańnia, jakija pražyvajuć na terytoryi krain byłoha SSSR, pryjechać u Polšču i pasialicca tut na stałaj asnovie.
«My dajom im takuju mahčymaść, navat bolš — my dajom im mahčymaść vielmi chutka atrymać polskaje hramadzianstva. A na praciahu pieršych, samych adaptacyjnych miesiacaŭ polskaja dziaržava akaža im padtrymku, dla taho kab jany adčuvali siabie tut, jak doma», — skazaŭ deputat «PiS».
U studzieni hetaha hoda Siejm Polščy padtrymaŭ u pieršym čytańni papraŭki da zakona ab Karcie palaka, jakija praduhledžvajuć pradastaŭleńnie uładalnikam hetaha dakumienta amal tych ža pravoŭ, što i hramadzianam Polščy.
Dziakujučy prapanavanym źmienam u zakonie, uładalniki Karty palaka zmohuć biaspłatna atrymlivać dazvoł na znachodžańnie ŭ Polščy, a paśla hoda pražyvańnia — aŭtamatyčna atrymlivać polskaje hramadzianstva. Akramia taho, praduhledžvajecca, što ŭrad častkova apłacić takim asobam kursy polskaj movy i kursy pavyšeńnia kvalifikacyi.
Taksama źmieny zakona dajuć jurydyčnyja padstavy dla evakuacyi i pradastaŭleńnie efiektyŭnaj dapamohi uładalnikam Karty palaka, u vypadku kali ich žyćciu i zdaroŭju pahražaje niebiaśpieka.
Akramia taho, uładalniki Kart palaka buduć vyzvalenyja ad konsulskich apłat za vizy i inšyja zajavy.
