Jurydyčnaja kampanija «Aviełum», jakuju najmaŭ prezident Ukrainy Piatro Parašenka dla padrychtoŭki da prodažu kampanii «Rašen» i dla pieradačy jaje ŭ «daviernuju ŭłasnaść», śćviardžajuć, što stvareńnie dla hetaha afšoraŭ było nieabchodnym.
Pra heta havorycca ŭ paviedamleńni kampanii.
«Stvareńnie kampanij u zamiežnaj jurysdykcyi było adzinym mahčymym šlacham dla pieradačy aktyvaŭ va ŭpraŭleńnie aŭtarytetnaj mižnarodnaj trastavaj struktury», — paviedamili jurysty.
Jany dadali, što «kampanii ŭ zamiežnych jurysdykcyjach nieabchodnyja i vykarystoŭvajucca mienavita dla pieradačy ich u blind trust (daviernuju ŭłasnaść)».
U «Aviełumie» taksama śćviardžajuć, što bankaŭskija rachunki hetymi kampanijami nie adkryvalisia, i jany nie ździajśniali nijakich finansavych apieracyj.
«Takim čynam, lubyja śćviardžeńni ab uchileńni ad vypłaty padatkaŭ źjaŭlajucca biespadstaŭnymi», — davodziać jany.
Jurysty taksama śćviardžajuć, što Parašenka nie pavinien byŭ dekłaravać hetyja kampanii, pakolki ich statutnyja fondy nie apłočvalisia, a akcyi Parašenki naminalnaha koštu nie mieli.
Jany zapeŭnili, što paśla pieradačy aktyvu ŭ daviernuju ŭłasnaść atrymalnikam vypłat budzie nie afšornaja, a ŭkrainskaja jurydyčnaja asoba.
«Tamu ŭsie padatki buduć płacicca va Ukrainie, i prybytki zhodna z zakanadaŭstvam i bankaŭskim rehulavańniem buduć zastavacca va Ukrainie», — zapeŭnili jurysty.
Jany dadali, što stvareńnie hetych afšoraŭ nie ŭpłyvaje na padatkaabkładańnie «Rašena» va Ukrainie, jaki praciahvaje vypłačvać padatki zhodna z ukrainskim zakanadaŭstvam.
Raniej Parašenka zajaviŭ, što tłumačeńni adnosna jaho dačynieńnia da «afšornaha skandału» pavinny dać jurysty.
Kamientary