U Mahilovie zatrymany troje padazravanych u zhvałtavańni dziaŭčyny. Śledčy kamitet: «Jany nie pravaachoŭniki»
Jak piša hazieta «Viečiernij Mohilev» (u numary za 6 krasavika), pavodle nieaficyjnaj infarmacyi, złačynstva ździejśnili troje ŭčastkovych inśpiektaraŭ i adzin były supracoŭnik Departamienta vykanańnia pakarańniaŭ. Adzin ź milicyjanieraŭ u cyvilnaj vopratcy paznajomiŭsia ŭ miascovym dyska-kłubie ź dziaŭčynaj, jakaja była ŭ stanie ałkaholnaha apjanieńnia. Jon pryvioz jaje na kvateru, dzie jaje padpaili, paśla čaho ŭsia kampanija, skarystaŭšysia biezdapamožnaściu dziaŭčyny, jaje hvałtavała.
Dziaŭčyna napisała zajavu ŭ milicyju. Pa adnoj viersii, jaje źbivali, paciarpiełuju padabrała «chutkaja». Hvałtaŭnikoŭ vyličyli z dapamohaj kamier videanazirańnia ŭ dyska-kłubie i, nibyta, usich čatyroch zatrymali i zavieźli ŭ stalicu. Jany sprabavali adkupicca ad dziaŭčyny, prapanoŭvali joj 20 tysiač dołaraŭ, śćviardžaje vydańnie.
Jak paviedamiła «Našaj Nivie» pradstaŭnica Śledčaha kamiteta Julija Hančarova, usio nie zusim tak, jak napisaŭ «Viečiernij Mohilev».
Zaviedziena kryminalnaja sprava suprać troch žycharoŭ Mahilova. Artykuł — «zhvałtavańnie, ździejśnienaje hrupaj asobaŭ» (č. 2 art. 166 KK). Rasśledavańniem spravy zajmajecca hałoŭnaje śledčaje ŭpraŭleńnie centralnaha aparatu Śledčaha kamiteta. Pa spravie pravodziacca śledčyja dziejańni. Padazravanyja znachodziacca pad vartaj. Vyśviatlajucca ŭsie abstaviny zdareńnia.
Adnak, pa słovach Hančarovaj, hetyja troje nie źjaŭlajucca supracoŭnikami pravaachoŭnych orhanaŭ. Hančarova taksama adznačyła: «Ja nie kamientuju čutki, jakija raspaŭsiudžvajuć jakija-kolviek haziety».
Kamientary