Biełaruskija čynoŭniki — ad kiraŭnikoŭ rajonnaha ŭzroŭniu da ministraŭ — nadalej pry zdabyćci słužbovych aŭtamabilaŭ pavinny aryjentavacca vyklučna na pradukcyju ajčynnaha aŭtaprama. Adpaviednaje daručeńnie daŭ siońnia Alaksandr Łukašenka, ahladajučy vystavu najnoŭšych uzoraŭ techniki, što vyrablajecca na biełaruskich pradpryjemstvach mašynabudavańnia.
Na vystavie, u pryvatnaści, byŭ pradstaŭleny lehkavy aŭtamabil pradstaŭnickaha kłasa, vytvorčaść jakoha SZAT «BiełDžy» płanuje pačać u Biełarusi ŭžo ŭ trecim kvartale hetaha hoda. Kiraŭnik krainy vysoka acaniŭ navinku z punktu hledžańnia zručnaści, asnaščanaści i dyzajnu. «Nijakaha impartu dla čynoŭnikaŭ, akramia premjera, vice-premjeraŭ i vyšejšych słužbovych asobaŭ», — daručyŭ kiraŭnik dziaržavy.
Alaksandr Łukašenka pry hetym rastłumačyŭ, što havorka nie idzie pra toje, kab za adzin raz pierasadzić usich słužboŭcaŭ na hetyja aŭtamabili, bo na heta syšli b vielizarnyja srodki. Tamu zamienu nieabchodna vyrablać pastupova, pa miery ŭźniknieńnia takoj nieabchodnaści. «Treba kuplać svaje aŭtamabili, tym bolš jany ŭ dva razy tańniej za niamieckija», - adznačyŭ biełaruski lidar.
«Vy skazali, što mašyna dobraja, značyć, niachaj čynoŭniki kuplajuć. Daručeńnie Šejmanu (kiraŭnik spraŭ prezidenta Biełarusi Viktar Šejman), niachaj prapracoŭvaje, dzie, kolki pa płanie pa ŭsioj viertykali, pačynajučy ad staršyni rajvykankama i zakančvajučy ministrami», — skazaŭ kiraŭnik krainy.
«Samaje hałoŭnaje, što my heta robim u siabie. Kali harantyju nie vytrymajuć, to pryjechaŭ na zavod i zrabiŭ», - reziumavaŭ biełaruski lidar.
Kamientary