Na terytoryi Łatvii ŭ na šeść miesiacaŭ budzie zabaronienaja retranślacyja i raspaŭsiudžvańnie prahram rasijskaha telekanała «Rasija-RTR». Takoje rašeńnie ŭ čaćvier, 7 krasavika, pryniała Nacyjanalnaja rada elektronnych ŚMI, paviedamlaje Delfi.lv.
Heta rašeńnie nabudzie moc paśla publikacyi ŭ haziecie Latvijas Vēstnesis.
Rada kanstatavała, što na praciahu 2015 hoda pieradačy «Rasii-RTR» nieadnarazova parušali Zakon ab elektronnych srodkach masavaj infarmacyi i dyrektyvu ES ab aŭdyjovizualnych pasłuhach.
«My ŭžo adnojčy zakryvali hety kanał (u 2014 hodzie), ciapier zakryvajem druhi raz. U minuły raz jany nie vykonvali zakanadaŭstva Łatvii, a ciapier — zakanadaŭstva ES. Heta surjoznyja parušeńni: zakliki da vajny i raspalvańnie nianaviści», — raspaviała kiraŭnik nacyjanalnaj rady Łatvii pa elektronnych ŚMI Aja Duleŭska.
Pieršaje parušeńnie, pa słovach Duleŭskaj, było zafiksavana ŭ pieradačy «Niadzielny viečar z Uładzimiram Sałaŭjovym». Na praciahu ŭsioj pieradačy nieadnarazova paŭtarałasia, što «Ukraina — terytoryja, akupavanaja nacystami i fašystami, ź imi niemahčymy dyjałoh, tamu što Ukraina — heta ahresar».
Druhi siužet, jaki vyklikaŭ niezadavolenaść rehulatara, mieŭ dačynieńnie da Łatvii.
«U źniaviečanym vyhladzie byŭ padniesieny apovied pra toje, što ruskaja mienšaść u Łatvii znachodzicca pad pahrozaj, a łatyšskaja maci moža bić ruskaje dzicia tolki tamu, što jano — ruskaje dzicia, — raspaviała Duleŭska. — Dalej było tłumačeńnie: amierykancy heta padtrymlivajuć, tamu što chočuć atrymać padstavu ŭvieści ŭ Łatviju tanki».
Trecim epizodam, što vyklikaŭ niezadavolenaść uład, staŭ jašče adzin vypusk «Niadzielnaha viečara z Uładzimiram Sałaŭjovym». U im havaryłasia pra toje, što «na Turcyju treba napadać chutka, źniščyć jaje z kosmasu, tamu što Turcyja rychtujecca zachapić Kaŭkaz», patłumačyła Duleŭska.
Łatvija atrymała dazvoł ad Jeŭrakamisii zakryć telekanał užo paśla druhoha parušeńnia, adnak rada prypyniła viaščańnie tolki paśla treciaha.
«Lubaja zabarona — śviedčańnie słabaści, — zajaviŭ kiraŭnik dyrekcyi mižnarodnych adnosin chołdynhu VDTRK Piotr Fiodaraŭ. — Nacyjanalny rehulatar, pa sutnaści, sprabuje prymusić VDTRK cenzuravać svaje prahramy». Na dumku Fiodarava, hetaja zabarona supiarečyć jeŭrapiejskim normam.
Kamientary