Pra skryŭleńnie śviadomaści čałavieka ŭ biazvychadnaj prastory — recenzija na «Vysotku» Bena Uitni
Vysotka (High-Rise)
Režysior: Ben Uitni
Žanr: drama, fantastyka
U rolach: Tom Chidałstan, Džerami Ajrans, Sijena Miler, Luk Evans, Elizabiet Mos, Džejms Pjurfoj, Kili Choŭz
Vialikabrytanija, 119 chv.
Adznaka: 8
Łondan, 1975 hod. Małady doktar Robiert Łenh zasialajecca ŭ hmach, sprajektavany architektaram Entani Rojałam. U im na vierchnich pavierchach žyvie hrupa ludziej, jakija viaduć raskošny ład žyćcia i izalujuć siabie ad astatniaha hramadstva. Łenh znajomicca z Ryčardam Uajłderam ź siarednich pavierchaŭ, jaki sprabuje źniać dakumientalny film pra noravy žycharoŭ roznych pavierchaŭ i mižkłasavuju niespraviadlivaść, jakaja pierarastaje ŭ adkrytuju varožaść.
Scenar antyŭtapičnaj stužki zasnavany na adnajmiennym ramanie anhlijskaha piśmieńnika Džejmsa Bałarda, jaki vyjšaŭ u 1975. Bałard pryznajecca adnym ź viadučych moŭnych stylistaŭ i prazorcaŭ.
Sam piśmieńnik mała źjaŭlaŭsia na publicy i nie ŭdzielničaŭ u hramadskaj ci litaraturnaj dziejnaści Vialikabrytanii. Jaho ramany nie tolki fantastyčnyja, kolki siurrealistyčnyja i daśledujuć psichałohiju i psichapatałohiju hramadstva.
«Vysotka» — zaklučny raman idejnaj tryłohii ab skryŭleńni śviadomaści čałavieka, zahnanaha ŭ biazvychadnuju prastoru vialikaha horada. Kali treciaja kniha była ekranizavanaja tolki praz 40 hadoŭ paśla vychadu, to pieršaja častka, «Aŭtakatastrofa», natchniła kanadskaha režysiora Devida Kronienbierha jašče ŭ 1996.
Film praciahły čas znachodziŭsia ŭ raspracoŭcy i navat byŭ pryznany «niezdymalnym». Režysiorski fatel zaniaŭ brytaniec Ben Uitni, režysior poŭnamietražnaha «Doktara Chto» (2014) i epizodaŭ adnajmiennaha sieryjała.
Bolšaść akciorskaj trupy taksama brytancy. Hałoŭnuju rolu vykanaŭ Tom Chidłstan, łaŭreat premii MTV za rolu Łoki ŭ filmach suśvietu Marvel. Jon pravioŭ niekatory čas u kampanii sudmiedekśpiertaŭ, kab padrychtavacca da zdymkaŭ, bo jaho hieroj — fizijołah.
Rolu architektara Rojała vykanaŭ uładalnik «Załatoha hłobusa», 67-hadovy Džerami Ajrans. Jaho hieroj apantany idejaj budaŭnictva piaci hmachaŭ, jakija simvalizujuć piać palcaŭ ruki. Ich žychary pavinny ŭtvaryć novuju madel hramadstva.
Viadučyja žanočyja roli zaniali amierykanki Sijena Miler i Elizabiet Mos. Samym ciažkim, paviedamiła apošniaja, było pierakanaŭča pramaŭlać z brytanskim akcentam.
Film pakidaje ciažkoje ŭražańnie. Dakładna i źjedliva pakazanaje hramadstva, jakoje imkliva vyradžajecca, jak tolki pierastaje chapać važnych resursaŭ na ŭsich žycharoŭ hmacha. Cikavaść vyklikaje pazicyja prystasavanca Łenha ŭ hetym biazładździ, jaki imkniecca admiežavacca ad dehradacyi i biesparadkaŭ, ale dziakujučy hetamu i zachoŭvaje ŭ sabie prykmiety čałaviečnaści.
Stylistyka filma ŭznaŭlaje interjery 70-80-ch, ale źviartajecca da retrafuturyzmu. Sceny vyhladajuć vyčvarna, źjaŭlajučysia adbitkam chvoraj śviadomaści, a nie rečaisnaści.
Stužka maje ŭzrostavaje abmiežavańnie 18+.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym6
Kamientary