Sioletniaje pasłańnie Alaksandra Łukašenki da naroda i parłamienta było presnym i strymanym. Dy i niadoŭhim, praciahvałasia jano ŭsiaho paŭtary hadziny. Nie naradziłasia novych chochmaŭ, chiba što «kureńnie – heta biezumije». Asnoŭnuju častku pramovy Łukašenka stroha kiravaŭsia napisanym zahadzia, redka sychodziačy ŭ ekspromt.
«Naša Niva» sabrała samyja istotnyja, na naš pohlad, punkty z vystupleńnia kiraŭnika dziaržavy.
Chłopčykami na pabiahuškach u Rasii nie budziem
Rasii tradycyjna byŭ pryśviečany dastatkova vialiki adrezak pramovy. Łukašenka, jak zaŭsiody, pierakonvaŭ, što heta našy braty i naša dola — žyć u słavianskim śviecie razam z ruskimi i ŭkraincami. Adnak razam z tym bolš istotnaj vyhladaje fraza: «Ja chaču skazać rasijskamu kiraŭnictvu, što my nikoli nie budziem chłopčykami na pabiahuškach». Łukašenka padkreślivaŭ, što Biełaruś i nadalej budzie vieści šmatviektarnuju palityku, a nie zasiarodžvacca na adnoj Rasii. Kiraŭnik dziaržavy padkreślivaŭ niadobrasumlennuju pazicyju rasijskaha boku, a taksama časam navat momanty šantažu, naprykład, kali Rasii admovilisia pradavać Minski zavod kołavych ciahačoŭ. Pa ŭsim vidać, što adnosiny Biełarusi i Rasii na siońnia daloka nie miadovyja.
Što tyčycca Jeŭropy, to siońniašni stan adnosinaŭ jon acharaktaryzavaŭ jak «havarylniu». Łukašenka skazaŭ, što zacikaŭleny čysta ŭ ekanamičnych adnosinach ź Jeŭropaj, handlem.
Zamianiać naftu i haz elektryčnaściu
Pra źmianšeńnie zaležnaści ad Rasii Łukašenka havaryŭ i ŭ častcy, datyčnaj atamnaj stancyi. «Mazhi, navuka, inavacyja — heta hałoŭnaje siońnia, a nie toje, što Hospad u ziamlu pakłaŭ», — skazaŭ kiraŭnik dziaržavy.
«U nas budzie lišak enierhii? Kali hramatna pastavicca, nijakaha lišku nie budzie. Davajcie zamianiać naftu, haz elektryčnaściu, dzie tolki možna. Čamu ŭ pobycie nie aryjentavać ludziej na elektryčnaść? Da hetaha treba rychtavacca ciapier».
«Mocna zaležać ad adnaho rynku zbytu — nielha, heta pryviadzie da biady», — kazaŭ pramoŭca.
Ščodraja krytyka čynoŭnikaŭ
Łukašenka šmat, vielmi šmat krytykavaŭ čynoŭnikaŭ. Za adstałaść, niepavarotlivaść, biezynicyjatyŭnaść, niežadańnie pierabudoŭvacca, žyć u novych realijach.
Voś prykład: «Partfiel prajektaŭ Suśvietnaha banka dla Biełarusi — kala $1 miljarda. Heta srodki, jakija ŭžo možna vykarystoŭvać. Ale ź ich $600 miljonaŭ da hetaha času nie zadziejničany praź niepavarotlivaść dziaržaŭnych orhanaŭ — cudy!».
Była krytyka Biełspažyŭsajuza. Kali jany nie pačnuć varušycca, Łukašenka paabiacaŭ, što dazvolić kankurencyju z boku pryvatnikaŭ. Kali kazaŭ pra Biełaruska-kitajski industryjalny park, abiacaŭ pryniać «žastačajšyja miery», u tym liku kadravyja.
Nie zapłaciš padatkaŭ — budzieš siadzieć
Uskosna Alaksandr Łukašenka prakamientavaŭ hučnyja kryminalnyja spravy suprać upłyvovych u krainie biznesmenaŭ, jak Juryj Čyž i Jaŭhien Baskin.
«Kažuć, «kahości zatrymali, aryštavali biznesmena. Chutka pryjduć inšych aryštoŭvać». Kaniečnie, pryjduć! Kali vy budziecie abdzirać dziaržavu i nie płacić padatki. I skažycie dziakuj, što vy jašče nie ŭ Amierycy. Hałoŭnaje — vypłata padatkaŭ. I možaš spakojna spać, možaš nie spać — heta tvajo prava. Ale addaj toje, što ty pavinien addać dziaržavie».
Žoŭtyja kanśpiekty
Łukašenka ci nie ŭpieršyniu ŭ stanoŭčym klučy havaryŭ pra internet. Kazaŭ, što raźvićcio IT — vielmi važnaje dla krainy.
Zatoje dastałosia nastaŭnikam škoł, a taksama vykładčykam univiersitetaŭ.
«Treba vychavać, naradzić novaha nastaŭnika. Naradzić novych — heta doŭha. Tamu naradžać budziem, pierarablajučy staroje nastaŭnictva. Treba ŭskałychnuć našaha nastaŭnika».
«I mnie, i vam treba čaściej być u VNU, dzie rychtujuć kadry. Prabačcie, ciapier tam učorašni dzień! Jak byli žoŭtyja kanśpiekty i zakaścianiełyja pohlady — hetak i zastajucca».
Adnak ślepa kapijavać zachodniuju adukacyjnuju madel Łukašenka nie źbirajecca. Znoŭ budzie šukać unikalny biełaruski šlach, voś tolki ci moža taki być?
