Biełarusi nie patrebnaja atamnaja stancyja, zajaviŭ ekanamist, kiraŭnik analityčnaha centra «Stratehija» Leanid Zaika, vystupajučy 22 krasavika ŭ Minsku na mižnarodnaj kanfierencyi pa biełaruskaj atamnaj enierhietycy.
Pavodle jaho słoŭ, rašeńnie budavać AES prymałasia va ŭmovach vysokich koštaŭ na naftu i haz i enierhietyčnych sprečak z Rasijaj.
«Ruskija tady pradavali naftu pa 420 dołaraŭ za tonu, a my kuplali ŭ Vieniesueły pa 800, — skazaŭ ekanamist. — Tady budaŭnictva rasceńvałasia jak svojeasablivy vyklik Rasii i admova ad rasijskaha ŭpłyvu na biełaruskuju enierhietyku».
Pry ciapierašnich cenach na naftu pytańnie budaŭnictva stancyi ŭžo nie aktualnaje, ličyć Zaika.
«Rašeńnie było pamyłkovym, i pra heta treba havaryć», — padkreśliŭ jon, dadaŭšy, što Astravieckaja AES — «čysta rasijski prajekt», dzie Biełaruś ničoha nie vyrašaje.
U razmovie z žurnalistami ekanamist zajaviŭ pra nieabchodnaść sychodzić ad myśleńnia vialikimi maštabami, jak heta było ŭ časy, kali Biełaruś była častkaj vialikaj dziaržavy.
«U śviadomaści palitykaŭ zastalisia pavialičanyja maštaby — vialikija stancyi, vialikija pradpryjemstvy. Ale Biełarusi patrebnaja nie atamnaja stancyja, a małaja enierhietyka, — rastłumačyŭ jon. — Heta lepšy varyjant raźvićcia enierhietyčnaj biaśpieki krainy».
Na dumku Zaiki, u Biełarusi treba stvaryć takuju sistemu, pry jakoj ułasnymi sistemami aciapleńnia i enierhazabieśpiačeńnia byli b zabiaśpiečanyja jak asobnyja kvatery, tak i cełyja pradpryjemstvy. «Heta kancepcyja budučaha, tak zvanaja ekanomika viedaŭ, tut jość pierśpiektyvy», — skazaŭ jon.
