Avataraŭ zajaviŭ, što praduchiliŭ terakt u Minsku

Vystupajučy 3 maja z apošnim słovam u sudzie Frunzienskaha rajona Minska, Taras Avataraŭ nieadnarazova zajaviŭ, što vybuchovaje prystasavańnie zdaŭ pravaachoŭnikam i svaimi dziejańniami «praduchiliŭ terarystyčny akt na terytoryi Minska».

Žychar Navapołacka Taras Avataraŭ (da 2011 hoda — Pośpich) byŭ zatrymany na čyhunačnym vakzale ŭ Minsku ranicaj 26 listapada minułaha hoda. Pry vobšuku ŭ jaho byli znojdzienyja maska z prarezami dla vačej, dva pašparty, samarobnaje vybuchovaje prystasavańnie na asnovie askiepkavaj hranaty, sihnalny pistalet, padobny na PM, elektronnyja nośbity, čorna-čyrvony ściah, a taksama daviedka pra ŭdzieł u antyterarystyčnaj apieracyi na terytoryi Ukrainy ad imia «Pravaha siektara». U momant zatrymańnia na im była armiejskaja broniekamizelka.

Avataraŭ abvinavačvajecca ŭ niezakonnym abarocie vybuchovaha prystasavańnia na asnovie askiepkavaj hranaty dla stankovaha hranatamiota AHS-17 «Połymia» i jaho niezakonnym pieramiaščeńni cieraz mytnuju miažu Biełarusi (č. 2 art. 295 i č. 2 art. 228 KK). Vinu pa pieršym składzie jon pryznaŭ, pa druhim — nie.

Pavodle jaho słoŭ, ab`iektyŭnym śviedčańniem praduchileńnia terakta ź`iaŭlajecca «pierajezd trojki (kantaktnaj hrupy pa ŭrehulavańni situacyi ŭ Danbasie) z hatela «Jeŭropa» ŭ hatel «Prezident», niepryjezd ŭ Minsk lidaraŭ DNR i ŁNR». «Terakt moh być nakiravany tolki suprać ich», — skazaŭ Avataraŭ. Jon paprasiŭ sud «uśviadomić heta».

U apošnim słovie abvinavačany taksama zajaviŭ: «Rašeńnie ab majoj pasadcy pryniataje nie tut».

Adzinym złačynstvam, jakoje ździejśniŭ u žyćci, Avataraŭ nazvaŭ toje, što staŭ hramadzianinam Respubliki Biełaruś. «Mnie soramna być hramadzianinam Respubliki Biełaruś», — zajaviŭ jon.

Majučy na ŭvazie papraŭki ŭ zakanadaŭstva ab uviadzieńni kryminalnaj adkaznaści za ekstremizm, jakija nabyli moc siońnia, niehatyŭna ich aceńvajučy, Avataraŭ zajaviŭ: «Budučy dobraachvotnikam, ja ź`iaŭlajusia ideałahičnym najmitam, mnie soramna być hramadzianinam svajoj krainy».

U adroźnieńnie ad dziaržabvinavaŭcy, Avataraŭ ličyć, što pa składzie złačynstva ab niezakonnym abarocie vybuchovaha prystasavańnia ŭ jaho jość try źmiakčalnyja akaličnaści: jaŭka z pavinnaj, sadziejničańnie śledstvu i pryznańnie viny. U hetym vypadku, pavodle słoŭ abvinavačanaha, mahčymaje pakarańnie za hetaje złačynstva pavinna być źnižanaje jak minimum u dva razy ad maksimalnaha, heta značyć ź siami da troch z pałovaj hadoŭ pazbaŭleńnia voli.

U toj ža čas dziaržabvinavaŭca paprasiŭ dla Avatarava na padstavie častki 2 artykuła 295 KK čatyry hady pazbaŭleńnia voli, a ŭsiaho z ulikam inkryminavanaj kantrabandy — piać hadoŭ pazbaŭleńnia voli.

Pakolki Avataraŭ upeŭnieny, što jon dobraachvotna zdaŭ vybuchovuju pryładu, to ŭ cełym, na jaho dumku, naohuł pavinien być vyzvaleny ad kryminalnaj adkaznaści za niezakonny abarot vybuchovaha prystasavańnia.

Prysud pa spravie Tarasa Avatarava budzie abvieščany 5 maja.

• 0
• 0
• 0
• 0
• 0
• 0
• 0
• 0