Na miescy byłoj vioski Michałova ŭ Minsku znajšli frahmienty arabskich maniet i kryžyk z pasielišča X stahodździa
Na skryžavańni mienskich vulic Janki Bryla i Alibiehava na miescy byłoha pryvatnaha sektaru budujuć novy žyły rajon. Archieolahi ŭžo znajšli tam artefakty, najraniejšy ź jakich datavali X stahodździem, raspaviadaje «Svabodzie» zahadčyk adździełu zachavańnia i vykarystańnia histaryčnaj spadčyny Instytutu historyi NAN Biełarusi Andrej Vajciachovič.
Pryčym raskopy tam jašče nie pačynalisia.
«Pakul tam iduć pracy pa vyvazie śmiećcia, jakoje zastałosia ad samoj vioski, kali jaje znosili, — kaža Vajciachovič. — A jak śmiećcie vyviezuć, pierad pačatkam niepasredna budaŭničych rabot, spadziajusia, budziem daśledavańnie pravodzić.
Kali było papiaredniaje daśledavańnie, znajšli niekalki frahmentaŭ manetaŭ, kryžykaŭ, kieramiki. Tam stajała vioska — kaniečnie, tam usio pieraviernuta, kulturny płast parušany. Ale kulturny płast tam jašče nia źniaty. Kali buduć zdymać, budziem prysutničać, pahladzim, jakija tam niekranutyja abjekty zachavalisia».
Siarod znojdzienaha — frahmenty arabskaha dyrchama X stahodździa i praskaha hroša XIV stahodździa, bronzavy kryžyk XI—XII stst. i kieramičny posud XI—XII dy XVI—XVII stst.
«Dyrcham — heta asnoŭny płaciožny srodak na terytoryi Eŭropy ŭ X stahodździ, — kaža Vajciachovič. — Sprava ŭ tym, što bolšaść pasieliščaŭ byli šmatfunkcyjanalnyja, tam byli i ramieśniki, i handal… Heta byŭ čas, kali žychary byli volnyja, niezapryhonienyja. Častka zajmałasia i sielskaj haspadarkaj, pramysłovaściu, pradavali svoj pradukt kupcam. Heta było na «šlachu z varahaŭ u hreki», i kali jon u siaredzinie XI stahodździa staŭ prypyniacca, to i pasieliščy pačali stanavicca vyklučna sielskahaspadarčymi».
Vajciachovič tłumačyć, što takija miescy, dzie słavianskija pasieliščy isnavali ŭ Ch stahodździ, nadzvyčaj cikavyja — jany mohuć dać infarmacyju i pra ŭźniknieńnie Miensku i akruhi, i pra farmavańnie dziaržaŭnaści na ziemlach sučasnaj Biełarusi. Niedaśledavanaha tam bahata, i samich takich pasieliščaŭ niamała. I archieolah nia maje sumnievaŭ, što tyja pasieliščy byli mienavita słavianskija — pa ŭsich pasieliščach pa race Miency materyjały śviedčać, što ŭ druhoj pałovie X stahodździa, a to i raniej, terytoryja była zasielenaja słavianami.
Ciapier čytajuć
U minskim mietro prachodziać vyprabavańni novyja ciahniki FOTY2
U minskim mietro prachodziać vyprabavańni novyja ciahniki FOTY
Rasijskaja nieanacystka, jakaja adsiadzieła 16 hadoŭ za zabojstva advakata i žurnalistki: Jon naprošvaŭsia svaimi pohladami na čačenskuju kampaniju1919
Kamientary