11 maja ŭ Biełaruś z dvuchdzionnym vizitam prybyŭ prezident Turkmienistana Hurbanhuły Bierdymuchamiedaŭ.
Pavodle infarmacyi pres-słužby biełaruskaha prezidenta, pa vynikach pieramoŭ Łukašenka i Bierdymuchamiedaŭ padpišuć sumiesnuju zajavu, nakiravanuju na «dalejšaje ŭmacavańnie ŭzajemavyhadnaha biełaruska-turkmienskaha supracoŭnictva».
Prezident Turkmienistana pasadziŭ dreva na Alei hanarovych haściej kala Pałaca Niezaležnaści i ŭziaŭ udzieł u cyrymonii adkryćcia kompleksu budynkaŭ pasolstva Turkmienistana ŭ Minsku.
Bierdymuchamiedaŭ zaprasiŭ biełaruskaha kalehu ŭziać udzieł u mižnarodnym forumie pa pytańniach raźvićcia tranzitnych transpartnych kalidoraŭ, jaki projdzie ŭ Turkmienistanie ŭ hetym hodzie.
Akramia taho, turkmienski prezident spyniŭsia na ekanamičnym supracoŭnictvie dźviuch krain. Pavodle jaho słoŭ, budaŭnictva na terytoryi Turkmienistana Harłykskaha horna-abahačalnaha kambinata pryniasie Biełarusi i Turkmienistanu «vielmi dobryja ekanamičnyja dyvidendy».
Bierdymuchamiedaŭ «z zadavalnieńniem adznačyŭ dobruju pracu mižuradavaj kamisii pa handlova-ekanamičnym supracoŭnictvie» i vykazaŭ nadzieju, što Biełaruś i Turkmienistan znojduć reziervy dla pavieličeńnia ŭzajemnaha tavaraabarotu. Prezident Turkmienistana taksama padziakavaŭ biełaruskamu boku «za padrychtoŭku vysokakvalifikavanych kadraŭ ź liku turkmienskaj moładzi ŭ biełaruskich VNU», paviedamlaje aficyjnaje biełaruskaje ahienctva BiełTA.