Kala stancyi mietro «Kamiennaja Horka» źmienicca schiema ruchu hramadskaha transpartu
Na hetym tydni na skryžavańni vulic Łabanka, Prytyckaha, Kuncaŭščyny pačnucca pracy pa źmienie schiemy ruchu i vydzialeńnia druhoj pałasy dla hramadskaha transpartu.
Pra heta karespandentu ahienctva «Minsk-Naviny» paviedamili ŭ HU «Staličny transpart i suviaź». Miarkujecca, što hetyja źmieny palehčać ruch hramadskaha transpartu ŭ rajonie stancyi mietro «Kamiennaja Horka» i zrobiać prypynki bolš zručnymi dla pasažyraŭ.
Prajekt płanujuć realizavać u traŭni na dvuch prypynkach «St. m. «Kamiennaja Horka», raźmieščanych na vuł. Łabanka i Kuncaŭščyna, i prypynku «Vuł. Burdziejnaha» (niedaloka ad skryžavańnia hetaj vulicy i vuł. Łabanka).
Pačnuć z prypynku kala HC «Maciaryk»: niekalki dzion, pakul buduć pravodzicca raboty, hety prypynačny punkt, chutčej za ŭsio, funkcyjanavać nie budzie. Pasažyram pryjdziecca iści kala 200 m da prypynku «Vuł. Burdziejnaha».
Varyjant rašeńnia daŭniaj prablemy, jakaja skłałasia kala skryžavańnia vulic Łabanka, Prytyckaha i Kuncaŭščyny, u minułym hodzie prapanavali UP «Minskhrad» i Biełaruskaja asacyjacyja ekśpiertaŭ i siurviejeraŭ na transparcie (BAES) pa zamovie kamiteta architektury Minharvykankama. Adzin z asnoŭnych elemientaŭ prajekta — «vyviernutyja kišeni» prypynačnych punktaŭ: placoŭki dla pasadki-vysadki pasažyraŭ prybliziać da druhoj pałasy i pakryjuć farbaj kantrasnaha koleru. A druhuju pałasu vydzielać dla pryjarytetnaha ruchu aŭtobusaŭ i tralejbusaŭ, jakija buduć iści pa joj, nie zajazdžajučy ŭ «kišeń».
Ciapier aŭtobusy i tralejbusy vymušanyja ździajśniać prypynak u «kišeni» (tut prajeznaja častka krychu pašyrana). Ale vyjechać z prypynačnaha punkta im čaściakom niaprosta, pakolki pobač na pieršaj pałasie zaŭsiody pryparkavanyja lehkavuški. Va ŭsiakim razie, takaja karcina nazirajecca na prypynku kala «Macieryka». Na dumku śpiecyjalistaŭ, paśla realizacyi prajekta pryparkavanyja kala prypynku lehkavyja aŭto nie buduć pieraškadžać hramadskamu transpartu. Aŭtobusy i tralejbusy zmohuć ruchacca, vysadžvać i prymać pasažyraŭ u hetym miescy prykładna na 25% chutčej, čym ciapier.
Važnaść vydzialeńnia pałasy dla pryjarytetnaha ruchu hramadskaha transpartu adznačyŭ načalnik adździeła arhanizacyi adździeła pasažyrskich pieravozak DU «STS» Alaksandr Kapciuch:
— Pa narmatyŭnych dakumientach, kali na peŭnych učastkach vulična-darožnaj sietki na praciahu hadziny prachodzić 30 i bolš adzinak haradskoha pasažyrskaha transpartu, rekamiendujecca vyłučeńnie asobnaj pałasy. Na paznačanym pierakryžavańni hety pakazčyk — adzin z samych vysokich u stalicy: 125 adzinak u hadzinu. Prajekciroŭščyki ŭpeŭnienyja, što vydzielenaja druhaja pałasa zmoža kaardynalna źmianić situacyju na skryžavańni. U lubym vypadku pasprabavać varta. Tym bolš tut nie patrebnyja bujnyja vydatki: nie patrabujecca vykanańnie vialikich budaŭničych rabot abo razbureńnie prajeznaj častki. Kali raptam akažacca, što ideja nie pracuje, možna ŭsio viarnuć.
Kamientary