Siamja sa Słucka raskazała, na što patracić 5 miljardaŭ, vyjhranych u łatareju
Muž i žonka sa Słucka Vasil i Alena Piatrenki pajšli na rynak pierad 23 lutaha, kab vybrać padarunak mužu. Ničoha nie znajšli, i Vasil vyrašyŭ uziać łatarejny bilet — faktyčna ŭpotaj ad žonki. Kvitkoŭ na najbližejšy tyraž nie było, i pryjšłosia ŭziać na śviatočny rozyhryš, pryśviečany 8 Sakavika. U vyniku Mižnarodny žanočy dzień prynios siamji 5 miljardaŭ rubloŭ.
«Skazaŭ žoncy, što naš bilet vyjhraŭ, a jana nie pavieryła»
Heta ŭžo druhi ŭ hetym hodzie bujny vyjhryš u łatareju «Supierłato». Dva miesiacy tamu siamja minčan taksama atrymała 5 miljardaŭ rubloŭ (kala 260 tysiač dalaraŭ). Tady pieramožcy kupili ščaślivy kvitok pierad Novym hodam.
«Kvitok kupiŭ sam, — raspaviadaje Vasil Piatrenka. — Žonka była suprać. Ja spačatku navat nie pahladzieŭ, što kvitki śviatočnyja. Kupiŭ — dy i ŭsio».
Ni muž, ni žonka nie byli zaŭziatymi hulcami ŭ łatareju, ale zredku ŭsio ž taki kuplali kvitok-druhi. Voś tolki Vasil zaŭsiody vieryŭ u pośpiech, a Alena ličyła, što zvyčajnyja ludzi nikoli nie vyjhrajuć, što «ŭsie pieramožcy padstaŭnyja».
Tamu kali muž, jaki siadzieŭ uvieś efir rozyhryšu pierad ekranam televizara i zakreślivaŭ ličby ŭ bilecie, paviedamiŭ žoncy radasnuju navinu, žonka jamu nie pavieryła.
«U nas dvuchpaviarchovy dom, i ja paśla taho, jak daviedaŭsia, što my vyjhrali, patelefanavaŭ žoncy z telefona na druhi pavierch. Ale jana mnie nie pavieryła i navat nie spuściłasia», — uspaminaje momant pośpiechu Vasil.
Alena stała ŭsprymać słovy muža ŭsurjoz, tolki kali pa zvanku baćki pryjechali dzieci ź siemjami, a adzin ź ziacioŭ jašče raz pravieryŭ vyniki.
«Hrošy płanujem vydatkavać na dziaciej i ŭnukaŭ»
Muž i žonka pryvykli ŭsiaho dabivacca svajoj pracaj. Vasil pracuje kiroŭcam u sistemie ŽKH, Alena — z 16 hadoŭ malar na budoŭli. Tamu takuju niečakanuju ŭdaču jany ŭspryniali vielmi emacyjna.
«Heta prosta ščaście! My vielmi zadavolenyja, bo ŭ nas vialikaja siamja», — kaža Alena.
A siamja i napraŭdu niemaleńkaja. Vasil Piatrenka pryjšoŭ u Ministerstva sportu i turyzmu na ŭručeńnie siertyfikata nie tolki z žonkaj, ale i dźviuma dočkami i piaćciu ŭnučkami. Ale ŭsiaho ŭ muža i žonki try dački, siem unučak i dvoje ŭnukaŭ. Unukam — ad 2 da 14 hadoŭ.
Pakul što ščaśliŭčyki nie prydumali, jak kankretna rasparadziacca vyjhryšam. «Płanujem vydatkavać na dziaciej i ŭnukaŭ, — raspłyvista kaža Alena. — My ŭžo chutka pojdziem na piensiju, treba im dapamahać».
«Treba, kab dom svoj u kožnaha byŭ, — razvažaje pieramožca. — A to my raniej žyli ŭsie ŭ adnym domie. Sabie, moža, mašynu kuplu inšuju, naviejšuju».
Alena taksama pryznałasia, što im z mužam nikoli nie ŭdavałasia źjeździć kudy-niebudź adpačyć. «Adrazu byli maleńkija dzieci, potym budavali dom. Vielmi chaciełasia b pajechać na adpačynak, ale jašče nie vyrašyli kudy. Moža być, naohuł usioj siamjoj pajedziem», — uśmichajecca žančyna.
«Častka hrošaj, napeŭna, na vučobu ŭnukaŭ pojdzie, — dadaje Vasil. — A naohuł my pakul tolki pryzvyčajvajemsia da samoj dumki, što stolki vyjhrali. Budziem jašče dumać».
Siertyfikat na 5 miljardaŭ rubloŭ Vasilu i Alenie ŭručyŭ namieśnik ministra sportu i turyzmu Alaksandr Dubkoŭski. Hrošy ŭžo zaličyli siamji na rachunak u banku. Padatkaŭ z vyjhryšu płacić nie treba.
Darečy, častku hrošaj pieramožca łatarei adrazu addaŭ na dabračynnaść. 15 miljonaŭ rubloŭ siamja pieradała na lačeńnie trochhadovaha chłopčyka Mikity Płytnika. Jašče 15 miljonaŭ Vasil achviaravaŭ «Respublikanskamu navukova-praktyčnamu centru dziciačaj ankałohii, hiematałohii i imunałohii».
Nahadajem, što raniej samy vialiki vyjhryš u historyi biełaruskich łatarej skłaŭ 3 miljardy rubloŭ. Ščaśliŭčykam akazaŭsia majstar cecha Barysaŭskaha zavoda aŭtatraktarnaha elektraabstalavańnia. Vyjhravali i pa 2 miljardy. Pieramožcam tady staŭ lesarub ź Viciebskaj vobłaści.
Kamientary