Akt ab demakratyi ŭ Biełarusi padoŭžać jašče na dva hady

Zakonaprajekt ab pradaŭžeńni jašče na dva hady Akta ab demakratyi ŭ Biełarusi ŭniesieny na razhlad u Pałatu pradstaŭnikoŭ Kanhresa ZŠA. Ab hetym paviedamlaje aficyjny sajt Pałaty pradstaŭnikoŭ Kanhresa.

Akt ab demakratyi ŭ Biełarusi byŭ pryniaty Kanhresam u 2004 hodzie, u 2006‑m jaho dziejańnie było pradoŭžana jašče na dva hady.

Inicyjataram novaha pradaŭžeńnia dziejańnia Akta ab demakratyi vystupiŭ jaho aŭtar kanhresmien Krys Śmit i jašče dzieviać členaŭ Pałaty pradstaŭnikoŭ.

U abnoŭlenym dakumiencie pryviedzieny danyja ab apošnich padziejach u Biełarusi. U pryvatnaści, zaznačana, što ŭ 2008 hodzie «ŭrad Biełarusi vyzvaliŭ niekalki palityčnych źniavolenych», ale eks‑kandydat u prezidenty Alaksandr Kazulin «usio jašče zastajecca ŭ turmie». Aprača taho, u dakumiencie havorycca ab tym, što Dziarždepartamient ZŠA i Ministerstva finansaŭ «zmahli efiektyŭna vykarystać Akt ab demakratyi dla prasoŭvańnia zajaŭlenych u im metaŭ».

U dakumiencie taksama padkreślivajecca, što palityka ZŠA ŭ dačynieńni da Biełarusi moža być źmieniena, jak tolki biełaruski ŭrad «prademanstruje prahres» u pytańni vykanańnia demakratyčnych norm i standartaŭ.

Aprača padtrymki biełaruskich pravaabaroncaŭ, niezaležnych ŚMI, prafsajuzaŭ, maładziožnych ruchaŭ, demakratyčnych palityčnych partyj, asobnym parahrafam u abnoŭlenym dakumiencie zhadvajecca padtrymka niezaležnaha radyjo‑ i televiaščańnia na Biełaruś. U pryvatnaści, havorycca ab padtrymcy «Radyjo svabodnaja Jeŭropa/Radyjo Svaboda», radyjostancyj «Hołas Amieryki» i «Jeŭrapiejskaje radyjo dla Biełarusi», a taksama spadarožnikavaha telekanała «Biełsat».

Nahadajem, što Akt ab demakratyi ŭ Biełarusi — 2006 praduhledžvaŭ vizavyja i ekanamičnyja sankcyi suprać urada Alaksandra Łukašenki za parušeńni ŭ halinie demakratyi. Jon taksama praduhledžvaŭ vydzialeńnie ŭradam ZŠA na praciahu dvuch hadoŭ 55 młn. dołaraŭ na padtrymku demakratyi ŭ Biełarusi. Ź ich 40 młn. pryznačałasia na raźvićcio hramadzianskich instytutaŭ i 15 młn. — na raźvićcio niezaležnaha tele‑ i radyjoviaščańnia Biełarusi.

Taciana Karaviankova, BiełaPAN

• 0
• 0
• 0
• 0
• 0