Śmiećciesartavalny zavod pad Hrodnam zapracuje praz paru tydniaŭ
Zaraz na pradpryjemstvie idzie apošniaja padrychtoŭka, a dla žurnalistaŭ zładzili impravizavanuju ekskursiju.
— Voś tut budzie pracavać kanviejer, tut buduć sartavacca adkidy, — supracoŭniki pakazvajuć na novieńkuju kanviejernuju stužku, zapuścić jakuju pavinny ŭžo hetym letam. U lubym razie, probny pusk zavoda zapłanavany na 1 lipienia. A pakul tut iduć zaklučnyja budaŭničyja raboty.
— Napeŭna, potym tut budzie nie taki śviežy pach?
— Pach, viadoma, budzie — heta ŭsio ž taki śmiećcie, ale ŭ nas ŭstanoŭleny mahutnyja vyciažki, tak što pracavać supracoŭnikam budzie kamfortna, — raspaviadaje dyrektar zavoda Viačasłaŭ Andrejeŭski.
Na pradpryjemstvie budzie pracavać bolš za 200 čałaviek u try źmieny. Pieršaja i druhaja źmieny zojmucca apracoŭkaj źmiašanych kamunalnych adkidaŭ, a treciaja — uparadkavańniem śmiećcia, jakoje ŭ horadzie sabrali ŭ raździelnyja kantejniery. Heta płastyk, papiera, škło i tekstyl.
Vytvorčaja mahutnaść zavoda — pierapracoŭka 120 tysiač ton ćviordych bytavych adkidaŭ. Pry hetym pradpryjemstva budzie pracavać usie dni ŭ hodzie biez vychadnych i pierypynkaŭ.
Zavod znachodzicca kala palihona CBA kala viosak Rahačy i Vysiełki Hrodzienskaha rajona. Novaje pradpryjemstva budujuć kitajcy. Košt — amal 29 miljonaŭ dalaraŭ.
Jašče try miesiacy paśla zapusku śmiećciesartavalnaha zavoda kitajskija śpiecyjalisty buduć sačyć za pracaj linii, a taksama navučać našych śpiecyjalistaŭ.
Paźniej pracavać tut buduć biełarusy, ale piersanał pakul nie nabirali.
Nieabchodnaść pabudovy takoha pradpryjemstva kala Hrodna naśpiavała daŭno.
Značnaja častka śmiećcia, jakoje my vykidvajem, — heta druhsyravina, jakuju možna pierapracavać. Pa statystycy, adzin hrodzieniec vykidvaje kala 500 kiłahram śmiećcia ŭ hod.
Na śmiećciesartavalnym zavodzie buduć padzialać płastyk, papieru, tekstyl. Druhsyravinu tut buduć sprasoŭvać, a potym adhružać pradpryjemstvam, jakija zajmajucca pierapracoŭkaj.
Kamientary