Pačaŭsia sud pa hučnaj spravie ab zabojstvie lohkaatletki Julii Bałykinaj. 29-hadovaha Dźmitryja Vištaluka abvinavačvajuć u zabojstvie z asablivaj žorstkaściu, kradziažy aŭtamabila i rečaŭ. Jamu moža pahražać da 25 hadoŭ ci navat rastreł.
Na sudzie abvinavačany trymaŭsia pryhniečana. Uvohule, praces pačaŭsia z taho, što advakat Vištaluka spaźniaŭsia, adnak na pytańnie, ci zhodzien abvinavačany pačać pasiadžeńnie biez abaroncy, toj tolki flehmatyčna kiŭnuŭ, pahadžajučysia. Praŭda, advakata ŭsio ž pačakali.
Pa viersii śledstva, paśla zabojstva Vištaluk viarnuŭsia ŭ kvateru i zabraŭ adtul załatyja ŭpryhožvańni, kamplekt paścieli, žanočyja boty, palito, sumačku, a taksama hrošy i mabilnik. Zabraŭ jon navat kaśmietyčku zahinułaj. Ahułam jon vynies rečaŭ na sumu nie mienš za 34 miljony rubloŭ.
Svaju vinu Vištaluk pryznaŭ całkam: i ŭ zabojstvie, i ŭ kradziažy. Ale pa jaho słovach, što tyčycca kradziažu, to rečy jon zabraŭ nie dziela vyhady. Paśla taho, jak sudździa patłumačyŭ, što kradziež — heta niepasredna zavałodańnie rečami z metaj vyhady, Vištaluk trochi padumaŭ i pahadziŭsia, pryznaŭšy vinu i ŭ hetym.
Zatym pačaŭsia dopyt Vištaluka.
Jon raspavioŭ, što viarnuŭsia z Maskvy ŭ Biełaruś u 2012 hodzie. Spačatku zdymaŭ pakoj u znajomaha, zatym — kvateru ŭ Sierabrancy. Zarablaŭ «šabaškaj» na budoŭlach. Paśla zajmaŭsia naciažnymi stolami razam sa znajomym. Kaža, što vychodziła kala 500 tysiač rubloŭ štodnia.
Z Bałykinaj jon paznajomiŭsia na sajcie znajomstvaŭ.
«Spačatku pamiž nami byli siabroŭskija adnosiny, zatym pačali žyć razam», — skazaŭ Vištaluk.
28 kastryčnika 2015 hoda, kali i zdaryłasia biada, jany ŭžo nie žyli razam. Ale, kaža Dźmitryj, jon dapamahaŭ z ramontam. Nie žyli ŭžo, bo pasvarylisia — trochi raniej, Dźmitryj uziaŭ 130 dalaraŭ u Julii i nie paśpieŭ viarnuć. Ale znosiny jany padtrymlivali. «Nianaviści nie było da jaje. Varožaści nie było», — skazaŭ Dźmitryj.
Pa słovach Vištaluka, u toj viečar jon pryjechaŭ kala 6-j viečara dapamahčy z naciažnoj stolaj u vannaj. Jon pačaŭ zajmacca ramontam, ale trochi paškodziŭ pałatno stoli. Bałykina vielmi razzłavałasia, ale jon patłumačyŭ, što ničoha strašnaha nie adbyłosia, i jana supakoiłasia, śćviardžaje Dzimtryj.
Zatym Julija pazvaniła kamuści, viarnułasia ŭ vannuju i pačała jaho adčytvać, kazać, što jon ničoha nie moža narmalna zrabić. U hety momant Dźmitryj stajaŭ na stule śpinaj da jaje.
«Ja nie viedaju, što dalej zdaryłasia. Prosta paviarnuŭsia i ŭdaryŭ małatkom. Padrabiaźniej raskazać nie mahu. I nie pomniu, i heta tyčycca vielmi pryvatnaha», — skazaŭ Dźmitryj.
Kolki ŭdaraŭ jon nanios, Vištaluk nie pamiataje. Kaža — 5-6. Zatym Bałykina ŭpała na bok. Ci biŭ jon jaje dalej — kaža, što nie pamiataje.
Zatym Vištaluk aprytomnieŭ i pabačyŭ, što narabiŭ. Bałykina lažała u vańnie i chrypieła -– jana ŭpała tudy paśla ŭdaraŭ. Vištaluk źniaŭ vopratku, u jakoj pracavaŭ, apranuŭ štodzionnuju i źbieh z kvatery. Nie vyklikaŭ chutkaj, bo spužaŭsia. Čaho spužaŭsia — patłumačyć nie moža, kaža, pačałasia panika. Pa darozie jon schapiŭ klučy ad mašyny Julii — kaža, «kab źjechać, źbiehčy». Pry hetym, u Vištaluka pravoŭ kiroŭcy nie było.
Pa jaho słovach, źbieh jon z kvatery kala pałovy na dziasiatuju viečara.
Paśla trahiedyi Dźmitryj sieŭ u «Kia Rya» Bałykinaj, pajechaŭ u hipiermarkiet — pakłaŭ hrošy na telefon. Sazvaniŭsia sa znajomym — kaža, chacieŭ vypić ź im. Ale štości tam nie vyjšła, i Vištaluk pajechaŭ na čyhunačny vakzał. Siadzieŭ u zale čakańnia da 2-j nočy, bo nie viedaŭ, što rabić dalej.
Ale kala 2-j hadziny nočy jon viarnuŭsia ŭ kvateru Bałykinaj. Julija ŭžo nie padavała prykmiet žyćcia. Dźmitryj uziaŭ plonku, zaharnuŭ u jaje cieła, pieranios u kalidor. Pačaŭ myć vannuju (kryvi było šmat, pa jaho słovach — «jak ručaj»).
Zatym jon sabraŭ upryhožvańni i rečy žančyny. Kaža, chacieŭ abstavić usio tak, nibyta Julija źjechała. Zatym vykinuŭ u kantejnier sa śmiećciem viadro i anuču, z dapamohaj jakich myŭ kvateru. Małatok vymyŭ i pakłaŭ na bałkonie.
Zatym Dźmitryj padahnaŭ mašynu pad padjezd. Pakłaŭ u jaje svaje rečy, na jakich była kroŭ (paśla vykinuŭ daloka ad doma). U bahažnik jon zahruziŭ trup.
«Pajechaŭ prosta… Spačatku biez mety. Prosta na MKAD. Nie viedaŭ, što rabić», — kaža Vištaluk.
Pa darozie vykinuŭ z vakna mašyny videarehistratar — u im byŭ ubudavany GPRS.
Takim čynam, Dźmitryj pajechaŭ pa trasie. Pačaŭ šukać čyhunačnuju stancyju — vydała, što bližejšaja Smalavičy.
Jon pakinuŭ niedaloka ad stancyi mašynu, sieŭ na bližejšy ciahnik i viarnuŭsia ŭ Minsk.
Na nastupny dzień Dźmitryj vyšaŭ na pracu. Paśla jaje pajšoŭ na vakzał, dumaŭ jechać u Smalavičy… ale zasnuŭ. Pračnuŭsia kala 3 nočy. Nastupnaja elektryčka była a 6-j ranicy. Dźmitryj nabyŭ na jaje kvitok.
U Smalavičach mašyna stajała na tym ža miescy, numary ź jaje Vištaluk źniaŭ jašče raniej.
Jon sieŭ u mašynu pačaŭ jeździć pa rajonie. Kaža, što šukaŭ, dzie jaje kinuć. Niezdalok ad vioski Staryna vyrašyŭ — tut. Vyciahnuŭ trup, adnios u les, abkłaŭ hallom i mocham.
Zatym jen pajechaŭ na zapraŭku vypić kavy, bo nadta chaciełasia spać. Paśla pajechaŭ u Žodzina — vyrašyŭ kinuć mašynu tam.
U Minsk viarnuŭsia elektryčkaj. Pa darozie zaŭvažyŭ, što zabyŭsia vykinuć zołata i ŭpryhožańni Bałykinaj. Spačatku chacieŭ padkinuć ich nazad u kvateru, ale było strašna tudy viartacca.
Jon pryjechaŭ na kvateru. Ale, kali Dźmitry byŭ užo ŭ padjeździe, jamu patelefanavaŭ brat Juli i skazaŭ, što ŭ jaje kvatery buduć łamać dźviery. Źniknieńnie žančyny ŭžo zaŭvažyli, i jaje šukali.
Tady Dźmitryj pakłaŭ upryhožańni ŭ pakiet z-pad žujek, jaki byŭ u jaho torbie, i pakinuŭ pakiet pamiž pavierchami.
Zatym Dźmitryj razam z bratam Bałykinaj, jaki padjechaŭ, pačali čakać milicyju.
Pryjechała milicyja. Dźmitryj pajechaŭ u RAUS, dzie ŭ jaho spytalisia, kali jon apošnim razam bačyŭ Juliju. Sam pryznaje, što jaho pačało treści. Heta zaŭvažyli milicyjanty — i nieŭzabavie Dźmitryj pryznaŭsia.
Da taho ž adzin ź piarścionkaŭ vyvaliŭsia z pakieta i zastaŭsia ŭ kišeni Dźmitryja. Jaho znajšli padčas pieratrusu ŭ RUUS.
Toje, što padčas zabojstva jon byŭ pad uździejańniem narkotykaŭ, Dźmitryj admaŭlaje. Ale pryznaje, što čas ad času moh dazvolić sabie marychuanu. Julija ž, pa jaho słovach, nie ŭžyvała.
Dźmitryj pryznaŭ, što paśla zabojstva, uviečary, uziaŭ u znajomaha trochi hašyšu. Potym, kali byŭ na vakzale, užyŭ jaho u mašynie. Častku vykuryŭ u Smalavičach, kali pakidaŭ tam mašynu. A reštu narkotyku prosta zhubiŭ.
Toje, što jon zabraŭ jašče niejkija rečy — boty, kamplekt paścieli, — Dźmitryj admaŭlaje.
Vinu svaju jon pryznaje. Padpisaŭ jaŭku z pavinnaj.
«Ja chaču paprasić prabačeńnia ŭ svajakoŭ… Choć viedaju, što za takoje ciažka vybačyć», — skazaŭ Dźmitryj.
«Boh vybačyć», — adkazała maci Bałykinaj.
***
Nahadajem: 31-hadovaja Julija Bałykina źnikła ŭ kastryčniku 2015 hodv. Pa śladach, znojdzienych na jaje aŭtamabili i ŭ kvatery, adrazu źjaviłasia viersija, što spartsmienku zabili. Padazreńnie ŭpała na jaje byłoha sužyciela Dźmitryja Vištaluka. Jaho aryštavali, jon pryznaŭsia ŭ zabojstvie, ale tak i nie paviedamiŭ, dzie schavaŭ cieła. Bolš jak praz tydzień pošukaŭ, da jakich pryciahnuli vajskoŭcaŭ, cieła Juli Bałykinaj znajšli ŭ lesie pad Minskam, schavanaje pad hallom u polietylenavym miechu.
Raniej śledčyja paviedamlali, što zabojstva Bałykinaj było ździejśniena Dźmitryjem u stanie, vyklikanym užyvańniem narkatyčnych srodkaŭ. Padčas svarki na hlebie niepryjaznych adnosin abvinavačany nanios Julii Bałykinaj 12 udaraŭ małatkom, pryčym 11 ź ich — pa hałavie
Dźmitryj na try hady maładziejšy za Juliju Bałykinu. Jon naradziŭsia va Ukrainie, u Varašyłaŭhradzie — siońnia heta sumna viadomy Łuhansk, — potym siamja pierajechała ŭ Rasiju. Z hetaj pryčyny dahetul padazravany maje rasijskaje hramadzianstva. Baćki trahična zahinuli, i Dźmitryj pierajechaŭ da dziadzi i cioci ŭ Rahačoŭ, dzie vyras i vyvučyŭsia na plitačnika-tynkoŭščyka ŭ kaledžy. Zatym peŭny čas jon žyŭ u Maskvie, paśla pierabraŭsia ŭ Minsk.
Julija Bałykina naradziłasia ŭ manholskim horadzie Bułhan. Pieravažna žyła ŭ Zaparožžy. Sportam pačała zajmacca vielmi pozna — u 18. U 23 hady spartsmienka pierajechała ŭ Biełaruś, stała čempijonkaj našaj krainy i pieršym numaram zbornaj na dystancyjach 100 i 200 mietraŭ. U svoj čas treniery spadziavalisia, što jana zmoža hodna zamianić alimpijskuju čempijonku Juliju Nieściarenka.
Kamientary