«Heta, na žal, źmianić niemahčyma». Bramnik zbornaj Biełarusi pa chakiei — trajuradny brat nacysta Milčakova
Jak stała viadoma Svabodzie, chakieist mienskaha «Dynama» i zbornaj Biełarusi Dźmitry Milčakoŭ davodzicca trajuradnym bratam rasiejskamu nacystu Alaksieju Milčakovu. Ale pamiž saboj jany nie kantaktujuć.
Paśla niadaŭniaha naviedvańnia Biełarusi kamandzir atrada rasiejskich nacyjanalistaŭ «Rusič» Alaksiej Milčakoŭ paviedamiŭ na svajoj staroncy ŭ sacyjalnaj sietcy «Ukantakcie», što chakieist mienskaha «Dynama» Dźmitry Milčakoŭ — jahony trajuradny brat. «Jaho dzied Milčakoŭ Dźmitry Siarhiejevič i moj dzied Milčakoŭ Alaksiej Siarhiejevič — rodnyja braty», — napisaŭ rasiejski bajavik.
Alaksiej Milčakoŭ
Svaboda praz pres-słužbu mienskaha «Dynama» atrymała paćvierdžańnie hetaj infarmacyi z boku samoha Dźmitryja Milčakova.
«Sapraŭdy, častka maich karanioŭ ź Piciera, — kaža Alaksiej Milčakoŭ. — U pryvatnaści, moj dziadula, Dźmitry Siarhiejevič Milčakoŭ pieražyŭ blakadu ŭ padletkavym uzroście i pryjechaŭ u Biełaruś padymać sučasnaje piaciborje. Jon vychavaŭ čempijonaŭ śvietu i Savieckaha Sajuza dla našaj krainy, staŭšy zasłužanym treneram. Tamu ja hanarusia svaim dziedam».
Dźmitry Milčakoŭ adznačaje, što nikoli sa svaim trajuradnym bratam Alaksiejam nia mieŭ nijakich znosinaŭ:
«Nakolki mnie niadaŭna stała viadoma, Alaksiej Milčakoŭ mnie davodzicca dalokim svajakom. Ja ź im nikoli nie pierasiakaŭsia i nia mieŭ znosinaŭ. Mnie vielmi niepryjemna, što proźvišča Milčakoŭ uspłyvaje ŭ takim niepryvabnym śviatle. Ale heta, na žal, źmianić niemahčyma. U žyćci my ŭsie vybirajem ułasny šlach i adkazvajem kožny za svaje ŭčynki. Maje — dalokija ad radykalnych», — dadaŭ chakieist zbornaj Biełarusi ŭ interviju Svabodzie.
Kamientary