Słužba biaśpieki Ukrainy praduchiliła sieryju z 15 teraktaŭ, jakija płanavalisia ŭ Francyi na Jeŭra-2016, zajaviŭ kiraŭnik SBU Vasil Hrycak.
Pavodle jaho słoŭ, terakty płanavalisia napiaredadni i padčas praviadzieńnia čempijanatu, jaki pačniecca 10 červienia.
Praca pa hetaj spravie doŭžyłasia kala šaści miesiacaŭ. Pa słovach Hrycaka, u śniežni 2015 hoda supracoŭnikam słužby stała viadoma, što francuz, jaki prybyŭ u krainu, naładžvaje kantakty z vajskoŭcami na ŭschodzie.
Hramadzianin Francyi zajmaŭsia vałanciorskaj dziejnaściu i cikaviŭsia, dzie va Ukrainie možna kupić zbroju i vybuchoŭku.
Pa dadzienych SBU, francuz niehatyŭna vykazvaŭsia pra masavuju mihracyju zamiežnikaŭ u Francyju i pavieličeńnie kolkaści musulmanaŭ.
Apieratyŭniki pieradali zamiežniku piać aŭtamataŭ Kałašnikava, bolš za piać tysiač patronaŭ, dva supraćtankavyja hranatamioty, 18 vystrałaŭ da ich, 125 kiłahramaŭ traciłu, 100 detanataraŭ i 20 bałakłavaŭ.
Pa dadzienych SBU, francuz płanavaŭ zładzić vybuchi ŭ miačeci, sinahozie, administracyjnych budynkach na Jeŭra-2016. Mierkavanaha złačyncu zatrymali na miažy pry sprobie kantrabandaj pravieźci zbroju.
Hrycak adznačyŭ, što inšaziemiec prapanoŭvaŭ hrošy za toje, kab hruz sa zbrojaj i vybuchoŭkaj u Jeŭropu supravadžaŭ ukrainiec. Na hetaj padstavie ŭ SBU zrabili vysnovu, što ŭ padrychtoŭcy teraktaŭ jość «rasijski śled».
Raniej u presie źjavilisia čutki pra mahčymuju padrychtoŭku ŭ Francyi teraktaŭ padčas Čempijanatu Jeŭropy pa futbole. Paviedamlałasia, u pryvatnaści, što adnoj ź mišeniaŭ terarystaŭ nibyta mahli stać hledačy matču pamiž Rasijaj i Anhlijaj, jaki adbudziecca 11 červienia.
Kamientary