U avaryi na «Hrodna-Azocie» zahinuli dvoje rabočych

Hrodzienskaje MNS adpraviła vyratavalnuju śpiectechniku na «Hrodna Azot», adkul pastupiŭ terminovy vyklik, paviedamiła BiełTA pres-sakratar Hrodzienskaha abłasnoha ŭpraŭleńnia MNS Natalla Žyvaleŭskaja.

Paviedamleńnie pastupiła ŭ abied, vyratavalniki adpravilisia na terytoryju pradpryjemstva i znachodziacca tam. Vidavočcy paviedamlajuć ab dziasiatkach aŭtamabilaŭ chutkaj dapamohi i MNS, jakija nakiravalisia ŭ bok «Hrodna Azot», a z terytoryi zavoda bačny dym.

«Na dadzieny momant MNS źbiraje infarmacyju, kab paviedamić, što mienavita adbyłosia na terytoryi pradpryjemstva», — patłumačyła pres-sakratar.

Jak paviedamlaje hrodzienski infarmacyjny resurs s13.ru, pa słovach adnaho z rabotnikaŭ, vobłaka pyłu vyryvałasia praz vokny i raskoliny ŭ ścienach adnaho z cechaŭ, a ŭ rocie adčuvaŭsia smak kisłaty.

Jak stała viadoma, dva čałavieki zahinuli. Zahinułym 35 i 28 hadoŭ, jany plitačniki-ablicoŭščyki. Jašče dvoje paciarpieli i byli adpraŭlenyja na mašynach chutkaj dapamohi ŭ reanimacyju.

«Jak paviedamiŭ adzin sa śviedkaŭ, achviary naohuł nie mieli nijakaha dačynieńnia da vytvorčaści. Chłopcy kłali plitku, a pobač vialisia raboty z ahniom, adbyŭsia vybuch. Adzin z zahinułych raźbiŭsia, vyskačyŭšy z akna budynka, druhoha vyjavili kala akna. Imaviernaja pryčyna — atručvańnie čadam», — piša s13.ru.

Jak paviedamlaje pres-słužba MNS, u 12:45 pastupiła paviedamleńnie ab zadymleńni ŭ adnym z cechaŭ AAT «Hrodna-Azot». Pavodle papiaredniaj infarmacyi pry praviadzieńni ahniavych rabot iskra trapiła na hidraksiłaminsulfat, u vyniku čaho śmiarotnaje atručeńnie parami atrymali dvoje rabočych, jašče dvoje byli špitalizavany. Rabotniki MNS padavali vadu na astudžeńnie rečyva.

Śledčy kamitet paviedamiŭ, što pa fakcie zdareńnia uzbudžanaja kryminalnaja sprava. Pravodziacca dopyty asob, jakija pravodzili raboty, a taksama ich niepasrednaha načalstva, pryznačany šerah ekśpiertnych daśledavańniaŭ. Kanfiskavana techničnaja dakumientacyja, u tym liku jakaja rehłamientuje vytvorčaść rabot u cechu.

«Hrodna-Azot» vypuskaje vadki techničny amijak, azotnyja ŭhnajeńni i bijadyzielnaje paliva. Kala 50% pradukcyi idzie na ekspart.

Farmalna heta adkrytaje akcyjaniernaje tavarystva, ale amal 100% akcyj naležać dziaržavie. Jašče kala 1000 čałaviek majuć drobnyja pakiety akcyj.

Piać hadoŭ tamu tut pracavała amal 11 tysiač čałaviek. Ciapier zastałosia 7750 rabotnikaŭ.

• 0
• 0
• 0
• 0
• 0