Biełaruskaha błohiera Eduarda Palčysa, viadomaha ŭ internecie jak Džon Silvier, etapavali z Branskaha SIZA ŭ Biełaruś. Jon znachodzicca ŭ śledčym izalatary na Vaładarcy ŭ Minsku. Pra heta paviedamlajuć znajomyja chłopca sa spasyłkaj na jahonaha baćku.
«Kali heta tak, treba patrabavać vyzvaleńnia», — piša Pavieł Sieviaryniec u fejsbuku. Jahony zapis sabraŭ 56 pierapostaŭ.
Błohiera, aŭtara bajavitaha sajta 1863x.com, zatrymali 23 studzienia pry pierasiačeńni ŭkrainska-rasijskaj miažy. Paśla hetaha identyčnaść błohiera raskryŭ adzin z rasijskich nacyjanalistyčnych sajtaŭ, jon ža apublikavaŭ turemnyja zdymki chłopca.
Jak akazałasia, błohiera zvać Eduard Palčys, jamu 25 hadoŭ, jon rodam ź Lidy (Hrodzienskaja vobłaść). Sam błohier nazyvaŭ siabie Jhon Silver.
Svajho sapraŭdnaha imia dla publiki jon nie raskryvaŭ, choć pravaachoŭnym orhanam jano było viadomaje. Suprać jaho ŭ Biełarusi letaś byli zaviedzienyja kryminalnyja spravy, a jon parušyŭ padpisku pra niavyjezd i razam z žonkaj vyjechaŭ va Ukrainu, dzie chacieŭ atrymać palityčny prytułak.
Poŭny varyjant jahonaha artykuła-spoviedzi na 1863x.com čytajcie tut.
Błohier raskazvaŭ, što ŭ Biełarusi jaho spačatku abvinavacili pa 130 artykule KK RB — raspalvańnie varožaści pa nacyjanalnaj prykmiecie za hety materyjał na sajcie 1863ch.com, a taksama za inšyja artykuły ŭ padtrymku Ukrainy na sajcie. Śledčyja interpretavali zaklik «Zabi «Ruski śviet» jak zaklik da zabojstva ŭsich ruskich.
Jhon Silver piša, što bajaŭsia za svaich rodnych i niaviestu — jakuju taksama šmat razoŭ dapytvali, bo jana była adzinym śviedkam jahonaj dziejnaści. Jon pryznaŭsia, što jon i jość stvaralnikam i administrataram sajta.
Paśla jahonych pryznańniaŭ, zapisanych na kamieru, chłopca na miesiac adpravili ŭ «Navinki» na dobraachvotnuju sudova-psichičnuju ekśpiertyzu. Tam jamu dazvalali sustrečy z rodnymi i siabrami, tam jon i daznaŭsia, što jahonaje źniknieńnie ź sieciva zaŭvažyli ŚMI. Jon miarkuje, što rozhałas u ŚMI i dapamoh jamu.
Paśla miesiaca ŭ «durcy» jaho adpuścili pad padpisku ab niavyjeździe.
Adnak paśla taho jak jon adnaviŭ publikacyi 1863ch.com, śćviardžaŭ jon, praź niekatory čas suprać jaho zaviali jašče adnu kryminalnuju spravu, za parnahrafiju, jakuju znajšli ŭ niekatorych fotažabach — čužych, jakija jon pieradrukavaŭ z rasijskaha šavinistyčnaha resursu ŭ jakaści prykładu rasijskaj prapahandy.
Paśla hetaha chłopiec vyrašyŭ pierajechać va Ukrainu razam z žonkaj. «Ja viarnusia pry pieršaj mahčymaści», — kazaŭ jon.
Siabry miarkujuć, što ŭ Rasiju jaho zvabili ludzi, jakija abiacali jamu cikavuju infarmacyju.
Kamientary