Štat pasolstva ZŠA ŭ Minsku papoŭnicca ekanamičnym daradcam. Pra heta zajaviŭ siońnia na bryfinhu dla 12 amierykanskich kampanij Pavierany ŭ spravach ZŠA Skot Rołand, paviedamili ŭ amierykanskaj ambasadzie. Takim čynam, ciapier u Biełarusi budzie siem pastajannych dypłamataŭ z ZŠA pry vaśmi dazvolenych MZS.
«Skot Rołand adznačyŭ, što ŭrad ZŠA padtrymlivaje raźvićcio handlu i inviestycyj pamiž ZŠA i Biełaruśsiu, i dadaŭ, što ŭ ramkach takich sumiesnych namahańniaŭ Ministerstva zamiežnych spraŭ ŭchvaliŭ pašyreńnie štatu pasolstva ZŠA ŭ Minsku na pasadu ekanamičnaha daradcy», — adznačyli ŭ pasolstvie.
Raniej ab chutkim źjaŭleńni ŭ Biełarusi siomaha amierykanskaha dypłamata paviedamiŭ kiraŭnik Džejmstaŭnskaha fondu Hlen Chovard.
Na siońniašnim bryfinhu biźnies-delehacyja ZŠA była pradstaŭlena 12-ju kampanijami, jakija pracujuć u rehijonie i vyvučajuć mahčymaść pašyreńnia ich dziejnaści na Biełaruś. Mierapryjemstva prajšło «u ciesnym supracoŭnictvie» ź biełaruskim MZS, dadali ŭ pasolstvie.
Delehacyja sustrełasia z namieśnikam kiraŭnika MZS Alaksandram Michnievičam, pradstaŭnikami Nacyjanalnaha ahienctva pa inviestycyjach i pryvatyzacyi i nacyjanalnaha banka Biełarusi.
«Biźnies-bryfinh taksama daŭ mahčymaść kampanijam ZŠA paznajomicca z patencyjalnymi biełaruskimi partniorami», — adznačyli ŭ pasolstvie.
***
Nahadajem, u sakaviku 2008 hoda, paśla ŭviadzieńnia ZŠA sankcyj u dačynieńni da kancerna «Biełnaftachim», pasoł Biełarusi Michaił Chvastoŭ byŭ adklikany z Vašynhtona dla kansultacyj, a Minsk pa patrabavańni biełaruskaha boku pakinuła pasoł Karen Stjuart. Kolkaść amierykanskich dypłamataŭ u Minsku było skaročana z 35 da piaci supracoŭnikaŭ.
U 2014 hodzie biełaruski bok dazvoliŭ pavialičyć štat ambasady ZŠA ź piaci da šaści čałaviek, i nieŭzabavie paśla hetaha amierykanskaje dyppradstaŭnictva pašyryła śpis vizavych pasłuh dla hramadzian Biełarusi.
Padčas svajho vizitu ŭ Minsk 29 sakavika namieśnica pamočnika ministra abarony ZŠA Majkł Karpenter zajaviŭ, što baki rychtujucca abmianiacca vajskovymi ataše.
25 krasavika 2016 hoda časovy pavierany ZŠA Skot Rołand zajaviŭ, što viartańnie pasłoŭ moža stać temaj dla abmierkavańnia pamiž Minskam i Vašynhtonam ŭžo ŭ hetym hodzie.