Zhodna sa scenarom vučeńniaŭ, adna z krain Bałtyi stała achviaraj pastupovaj i nachabnaj ekspansii z boku mahutnaha susieda. Hrupy bajevikoŭ sprabujuć razdźmuć masavyja chvalavańni, zachapić uładu ŭ pamiežnych haradach, pačynajuć ataki na palicyju i važnyja abjekty haspadarki. Adbyvajucca kibierataki i sproby zachapić ci paškodzić infarmacyjnyja sietki.
Vučeńni adbuducca pa ŭsioj terytoryi Polščy
Zatym adbyvajecca ŭvarvańnie varožych vojskaŭ u Bałtyju i Polšču, praciŭnik imkniecca da anieksii akupavanaj terytoryi.
Atakujuć «sinich» (Polšču i jaje chaŭruśnikaŭ) vydumanyja «čyrvonyja» krainy Bothnia, Torrike i Lindsey. Polšča źviartajecca ŭ NATA pa dapamohu.
Adnak, imavierna, try vydumanyja «krainy» — heta try rasijskija vajskovyja kantynhienty, jakija znachodziacca ŭ Kalininhradskaj vobłaści, na terytoryi samoj RF uzdoŭž miežaŭ Estonii i Łatvii, a taksama, jak ni sumna, na terytoryi Biełarusi.
Uličvajučy, što scenar uklučaje taksama anieksiju «čyrvonymi» jašče adnoj «vydumanaj dziaržavy», mahčyma, hetaja dziaržava — Biełaruś ci adna z krain Bałtyi.
U hetym kantekście važniejšym dla chaŭruśnikaŭ budzie zachavać naziemnuju suviaź pamiž Polščaj i Litvoj — kalidor pamiž Biełaruśsiu i Kalininhradskaj vobłaściu RF.
Tut na dapamohu prybałtam pryjduć amierykanskija miechanizavanyja častki. Kab zabiaśpiečyć ichny marš navat u vypadku źniščeńnia mastoŭ, sapiory pavinny maksimum za hadzinu pabudavać most praź Visłu ŭ miescy, dzie raka maje prykładna kiłamietrovuju šyryniu.
Razhornucca niabačnyja apieracyi ŭ śfiery radyjoelektronnaj baraćby. Žycharoŭ Torunia papiaredžvajuć pra mahčymyja pieraboi z suviaźziu.
Płanujecca pravieści vučeńni sił supraćpavietranaj abarony, a taksama źniščeńnie rakietna-artyleryjskim udaram supraćpavietranych kompleksaŭ Rasii S-400, jakija, kali buduć stajać u Kalininhradzie, buduć mocna zaminać avijacyi sajuźnikaŭ.
Amierykanskija žaŭniery prajazdžajuć litoŭska-łatvijskuju miažu pierad pačatkam vučeńniaŭ.
Sioleta aficyjnaja «tema» vučeńniaŭ uklučaje supraćstajańnie «hibrydnym» pahrozam — to bok spałučeńniu dziejańniaŭ prapahandysckaha i vajennaha charaktaru, u tym liku z boku vojskaŭ i śpiecyjalnych padraździaleńniaŭ, jakija dziejničajuć pad čužym ściaham.
«Scenar vučeńniaŭ zasnavany na realnych padziejach… Na realnych pahrozach», — adznačyŭ pradstaŭnik Apieratyŭnaha ŭpraŭleńnia Uzbrojenych sił Polščy padpałkoŭnik Piotr Vałatek.
U Anakonda-16 pieršy raz biaruć udzieł siły Terytaryjalnaj abarony Polščy, jakija zaraz arhanizujucca jak asobny vid uzbrojenych sił krainy. Stvoranyja pa vopycie vajny va Ukrainie miascovyja farmiravańni buduć abaraniać važnyja abjekty ŭ svaich rajonach, dapamahać rehularnaj armii i likvidavać varožych dyviersantaŭ.
Vidavočna, pryčynaj padrychtoŭki da takoj pahrozy stali dziejańni Rasii va Ukrainie — padčas anieksii Kryma i vajny na Danbasie.
Analityk polskaha Instytuta mižnarodnych spraŭ Artur Karpčyk ličyć, što hetyja manieŭry — sihnał Maskvie, demanstracyja palityčnaj voli sajuźnikaŭ, zdolnaści ich vojsk dziejničać u vypadku kanfiktu razam i vielmi apieratyŭna.
«Meta — pravieryć zdolnaść krain Sajuza abaranić svoj uschodni fłanh», — skazaŭ ministr abarony Polščy Antoni Maciarevič.
«Meta Anakonda-16 — abjadnać usich, kab pakazać, što my staim popleč z polskim narodam, z polskaj armijaj i NATA, kab usie krainy NATA zastavalisia volnymi i niezaležnymi», — skazaŭ napačatku vučeńniaŭ načalnik štaba Suchaputnych vojskaŭ ZŠA Mark Mili.
Uračystaja cyrymonija adkryćcia vučeńniaŭ.
Adpracoŭvajecca taksama častkovaja mabilizacyja reziervistaŭ u Polščy i krainach Bałtyi, dapamoha vialikaj kolkaści cyvilnych i vajskovych achviaraŭ — vajna va Ukrainie navučyła NATA, što Maskva budzie masava vykarystoŭvać artyleryju i ciažkuju braniatechniku.
Amal adnačasova na Bałtycy prachodziać vajskova-marskija vučeńni Baltops-2016, a ŭ krainach Bałtyi — vučeńni Saber Strike.
Chutkaść reakcyi, hatoŭnaść da supracoŭnictva častak roznych armij pad adnym kamandvańniem, apieratyŭnaść ruchu pa ziamli, pa mory i ŭ pavietry — voś hałoŭnaja ideja Anakonda-16.
Paralelna adbyvajucca vialikija vučeńni šmatnacyjanalnych pavietrana-desantnych vojsk Swift Response 16. Jany pačalisia jašče 27 maja, a skončacca tolki 26 červienia.
Bolš za 5000 desantnikaŭ i lotčykaŭ krain NATA demanstrujuć maksimalna chutkuju reakcyju na krytyčnuju situacyju.
Hetak, bataljon 1-ha pałka 82-j pavietrana-desantnaj dyvizii ZŠA za minimalny termin siadzie ŭ samaloty na svajoj amierykanskaj bazie i za 10 hadzin budzie ŭ Jeŭropie — z dazapraŭkaj samalotaŭ pa darozie i płanavańniem budučaha boju.
Nad terytoryjaj Polščy jany abjadnajucca z brytanskimi i polskimi parašutystami i skoknuć na ziamlu ŭ rajonie horada Toruń. Asobna buduć prachodzić vučeńni desantnikaŭ u Niamieččynie.
Zaraz «Kantynhientam hłabalnaha terminovaha reahavańnia» u ZŠA źjaŭlajecca 1-ja bryhadnaja hrupa 82 dyvizii PDV. Asobna ŭ Jeŭropie prysutničaje 173-ja pavietrana-desantnaja bryhada ZŠA, padraździaleńni jakoj voźmuć udzieł u desantach na poŭnačy Polščy.
Mienavita desantniki, jak płanujecca, voźmuć pad kantrol hałoŭnyja vuzły kamunikacyj i masty, praź jakija potym dziakujučy roznym etapam vučeńniaŭ u bok krain Bałtyi pojdzie amierykanskaja ciažkaja braniatechnika ŭ ramkach vučeńniaŭ Anakonda-16.
Samyja vialikija vučeńni sił NATA na terytoryi Polščy ŭ historyi hetaj krainy stanuć demanstracyjaj mocy i rašučaści aljansa baranić svaich siabroŭ ad luboj pahrozy pierad samitam NATA ŭ Varšavie 8—9 lipienia.
Na samicie, jak čakajecca, budzie pryniata rašeńnie pra stałaje raźmiaščeńnie značnaj kolkaści sajuznych vojsk ŭ Polščy i krainach Bałtyi, piša theguardian.com
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)