SK raspavioŭ padrabiaznaści spravy Džona Silviera: jamu pahražaje da 5 hadoŭ źniavoleńnia
Pres-sakratar Śledčaha kamiteta Julija Hančarova paviedamiła Svabodzie, što ciapier praciahvajecca rasśledavańnie kryminalnaj spravy ŭ dačynieńni Eduarda Palčysa — stvaralnika błoha 1863x, bolš viadomaha jak Jhon Silver.
Paviedamlajecca, što ŭpraŭleńniem Śledčaha kamiteta pa Minsku rasśledujecca kryminalnaja sprava ŭ dačynieńni da 25-hadovaha ŭradženca Hrodzienskaj vobłaści pavodle č. 1 art. 130 (raspalvańnie rasavaj, nacyjanalnaj ci relihijnaj varožaści abo roźni) i č. 2 art. 343 (raspaŭsiudžvańnie parnahrafičnych materyjałaŭ) Kryminalnaha kodeksa Respubliki Biełaruś.
Za «raspalvańnie varožaści» Palčysu pahražaje aryšt na termin da 6 miesiacaŭ ci abmiežavańnie albo pazbaŭleńnie voli na termin da 5 hod. Za «raspaŭsiud parnahrafii» — pazbaŭleńnie voli na termin ad dvuch da čatyroch hod.
«Vyznačana, što padśledny, źjaŭlajučysia administrataram sajta www.1863x.com, raźmiaščaŭ na im materyjały, jakija ŭtrymlivajuć prykmiety raspalvańnia nacyjanalnaj varožaści abo roźni, a taksama vyjavy parnahrafičnaha źmiestu. Heta paćviardžajecca vynikami praviedzienych ekśpiertyzaŭ», — paviedamili ŭ SK.
Jak adznačajuć u pres-słužbie SK, pieršapačatkova da Palčysa była ŭžytaja miera strymańnia ŭ vyhladzie padpiski ab niavyjeździe i naležnych pavodzinach.
«Adnak abvinavačvany vyrašyŭ schavacca ad kryminalnaha pieraśledu i ŭ kastryčniku 2015 hoda vyjechaŭ za miežy Respubliki Biełaruś. U hetaj suviazi jon byŭ abjaŭleny ŭ miždziaržaŭny vyšuk. U hety čas rasśledavańnie kryminalnaj spravy praciahvajecca, mužčyna ekstradziravany z terytoryi Rasijskaj Fiederacyi, da jaho ŭžytaja miera strymańnia ŭ vyhladzie zaklučeńnia pad vartu», — paviedamiła Julija Hančarova.
Kamientary