U Viciebsku pačali zbor podpisaŭ suprać źjaŭleńnia pomnika Alaksandru Nieŭskamu
U supołcy «Viciebsk — volnyja horod! Haradskoje samakiravańnie!» u Facebook viciebski błohier Andrej Kiešaniuk raźmiaściŭ paviedamleńnie pra toje, što jon źbiraje podpisy pad zvarotam u harvykankam z patrabavańniem admovicca ad ustalavańnia pomnika naŭharodskamu kniaziu Alaksandru Nieŭskamu.
Svajo patrabavańnie ŭ zvarocie jon arhumientuje tym, što nie isnuje paćvierdžanaj histaryčnymi krynicami značnaj suviazi kniazia Alaksandra Jarasłaviča z historyjaj Viciebska. Bolš za toje, adznačaje Kiešaniuk, u adpaviednaści z šeraham letapisaŭ Nieŭski uznačalvaŭ abjadnanaje naŭharodska-ćviarskoje vojska, jakoje pad Tarapcom zmahałasia suprać abjadnanych biełaruska-litoŭskich sił, h.zn. pad jaho kiraŭnictvam zabivali prodkaŭ sučasnych biełarusaŭ.
Taksama niedastatkovaj pryčynaj dla źjaŭleńnia padobnaha pomnika ŭ Viciebsku błohier znachodzić kananizacyju Alaksandra Jarasłaviča Ruskaj pravasłaŭnaj carkvoj, pakolki nasielnictva horada šmatkanfiesijnaje i tradycyi šanavańnia mienavita hetaha śviatoha ŭ abłasnym centry niama.
Akramia taho ŭ zvarocie adznačajecca, što admoŭnuju acenku źjaŭleńniu pomnika naŭharodskamu kniaziu daŭ šerah biełaruskich historykaŭ i navukoŭcaŭ. Jak alternatyvu Andrej Kiešaniuk prapanoŭvaje ŭładam horada razhledzieć mahčymaść ustanoŭki na płoščy 1000-hodździa pomnika Michaiłu Pancyrnamu i Ściapanu Avierka, jakija stvaryli viadomy letapis Viciebska.
Žycharoŭ Viciebska, jakija žadajuć padpisać hety zvarot, błohier prosić źviazacca da jaho pa telefonie +375-29-5166044 (MTS). Źbirać podpisy jon budzie da čaćviarha, a zatym nakiruje zvarot u harvykankam.
Płanujecca, što pomnik kniaziu Alaksandru Nieŭskamu ŭ Viciebsku adkryjuć padčas śviatočnych mierapryjemstvaŭ, pryśviečanych Dniu horada. Padrychtoŭka da jaho ŭstaloŭki pačałasia jašče ŭ kancy maja.
Kamientary