U Sievastopali pryznali, što «kulturnaja interviencyja» dapamahła Rasii zachapić Krym.
Układańnie srodkaŭ Rasijskaj Fiederacyi ŭ adukacyju i kulturu Sievastopala adyhrała značnuju rolu ŭ anieksii Kryma. Pra heta paviedamiła deputat haradskoha parłamienta Sievastopala, staršynia kamiteta pa sacyjalna-humanitarnych pytańniach Taćciana Ščarbakova ŭ ramkach fiestyvalu «Vialikaje ruskaje słova».
«Šmatmiljardnyja ŭlivańni ŭ ekanomiku susiedniaj krainy ŭ nadziei na łajalnaść elity, na žal, nie prynieśli vynikaŭ. Značna bolš dziejsnym stałasia ŭkładańnie srodkaŭ u adukacyju i kulturu. Pradmiet «Sievastopaleznaŭstva», praca z kalektyvami ŭstanoŭ kultury, raznastajnyja navukovyja humanitarnyja forumy ŭ Sievastopali, napeŭna, i «skłali» toj mientalitet, jaki dazvoliŭ sievastopalcam u dni niebiaśpieki skancentravacca i, u kančatkovym vyniku, pryvioŭ da taho vyniku, jaki my ciapier majem. Kulturnyja imprezy, vyvučeńnie rodnaj movy, litaratury, ajčynnaj historyi — usio heta dapamahaje zachavać duchoŭna-maralnyja asnovy «ruskaha śvietu»», — cytuje Ščarbakovu pres-słužba parłamienta Sievastopala.
Śpikierka Rady Fiederacyi Rasii Valancina Matvijenka, jakaja ŭziała ŭdzieł u fiestyvali «Vialikaje ruskaje słova», paviedamiła, što paśla 2014 hady Rasija skarektavała svaju palityku «ŭ dačynieńni da suajčyńnikaŭ, umacavańnia adnosin z zamiežnym «ruskim śvietam», jaki jadnaje dziasiatki miljonaŭ čałaviek u bolš čym sta krainach». Napiaredadni, na adkryćci fiestyvalu, Matvijenka zajaviła, što Rasija «pavinna vieści surjoznuju pracu pa padtrymcy cikavaści da ruskaj movy za miažoj».
Kamientary