U sieradu, 8 červienia, u budynku Hienieralnaha konsulstva Respubliki Polšča ŭ Breście adbudziecca viernisaž «Brest-nad-Buham: śviet i vajna. 1920—1939 hh. Častka 2». U ekspazicyi źjaviacca 48 fotazdymkaŭ z pryvatnaj kalekcyi minskaha architektara Andreja Dałhoŭskaha.
Kancepcyja vystavy — heta praciah pačataha ŭ 2014 hodzie padarožža ŭ časie, jakoje prachodzić praz centralnyja vulicy Bresta-nad-Buham i dazvalaje zirnuć na jaho žycharoŭ, a taksama ŭ poŭnaj miery adčuć atmaśfieru mirnaha horada siaredziny 1930-ch hadoŭ. Na fotazdymkach mižvajennaha času taksama pakazany sałdaty i aficery Vojska Polskaha na vučeńniach i ŭ pobycie.
Da siaredziny ekspazicyi karcina mirnaha raźmieranaha žyćcia mirnych žycharoŭ i vajskoŭcaŭ raptoŭna mianiajecca vidami padpalenych viosak u vakolicach Bresta, varonak ad bombaŭ i snaradaŭ niepasredna na vulicach horada, kadrami razburanych budynkaŭ, raźbitaj i zachoplenaj techniki i zahinułych sałdat, jakija vykanali svoj abaviazak da kanca i nazaŭždy zastalisia bresckim harnizonam vieraśnia 1939-ha.
Asobnym frahmientam u ahulnuju kancepcyju ŭklučany vidy skryžavańniaŭ zachoplenaha horada ź mirnymi žycharami na jaho vulicach.
Dapaŭniajuć trahičnuju karcinu vidy krepaści z ahulnymi abo frahmientarnymi zdymkami vajennapałonnych, jašče niadaŭna byłych jaje abaroncami. Adźniatyja niamieckimi fatohrafami ŭ prapahandysckich metach partrety hetych vajskoŭcaŭ — časta apošniaja začepka dla svajakoŭ, jakija da hetaha času sprabujuć daviedacca los svaich blizkich, źnikłych u žornach suśvietnaj vajny.
Kaardynataram prajekta vystupiŭ brescki krajaznaŭca Ivan Čajčyc.
Vystava, jakaja budzie pradstaŭlena ŭ zale pryjomaŭ Hienieralnaha konsulstva RP u Breście, pieramieścicca ŭ vizavy adździeł konsulstva, dzie budzie demanstravacca na praciahu miesiaca.
Kamientary