Akcyja pa biazvypłatnaj zdačy kryvi projdzie 14 červienia ŭ Minsku, paviedamili ŭ Haradskim centry transfuzijałohii UZ «6-ja haradskaja kliničnaja balnica».
Udzielnikami akcyi ŭ pieršuju čarhu stanuć miedycynskija rabotniki 6-j haradskoj kliničnaj balnicy, siarod jakich šmat hanarovych donaraŭ. Padtrymać raźvićcio biazvypłatnaha donarstva taksama zaprašajucca ŭsie achvotnyja z 9.00 da 12.00. Papiaredni zapis nie patrebny. Usim, chto zdaść kroŭ biazvypłatna, buduć uručanyja suvieniry. Mierapryjemstva projdzie pa adrasie vuł. Uralskaja, 5, korpus 5.
U Biełarusi stać donarami mohuć absalutna zdarovyja ludzi va ŭzroście ad 18 hadoŭ (žančyny — da 55 hadoŭ, mužčyny — da 60).
Metanakiravanaja praca pa adradžeńni biazvypłatnaha donarstva pravodzicca ŭ krainie z 2013 hoda. Pa inicyjatyvie Ministerstva achovy zdaroŭja ŭ 2015 hodzie padpisany zakon «Ab uniasieńni dapaŭnieńniaŭ i źmianieńniaŭ u niekatoryja zakony Respubliki Biełaruś pa pytańniach donarstva kryvi i jaje kampanientaŭ», dzie zamacavanaja pryjarytetnaść vykanańnia donarskaj funkcyi na biazvypłatnaj asnovie, urehulavanyja pytańni pradastaŭleńnia harantyj i kampiensacyj biazvypłatnym donaram.
Ciapier udzielnaja vaha biazvypłatnaha donarstva vahajecca ŭ rehijonach krainy ŭ miežach 15-20%. Za 2015 hod u paraŭnańni z 2014-m kolkaść biazvypłatnych danacyj pavialičyłasia ŭ respublicy amal na tracinu. Suśvietnaja arhanizacyja achovy zdaroŭja zaklikaje ŭsie krainy — siabry SAAZ ukaranić 100-pracentnaje biazvypłatnaje donarstva.
U Biełarusi 14 červienia adznačać Suśvietny dzień donara kryvi, deviz jakoha ŭ hetym hodzie «Kroŭ abjadnoŭvaje ŭsich nas». Śviatočnyja mierapryjemstvy pryśviečanyja ludziam, jakija vykonvajuć humannuju misiju, biazvypłatna dajučy svaju kroŭ u imia vyratavańnia žyćcia chvorych abo paciarpiełych u katastrofach, novanarodžanych ź ciažkimi patałohijami i ciažarnych žančyn z masiŭnymi krovastratami. Pradstaŭniki orhanaŭ ułady i hramadskich abjadnańniaŭ, miedycynskaja supolnaść i sacyjalna adkazny biznes va ŭračystaj abstanoŭcy mohuć źviarnucca sa słovami padziaki da donaraŭ.
