13 červienia ŭ prahramie «Forum» na telekanale «Biełaruś-1» ź Dźmitryjem Bačkovym vyśviatlali, što takoje nacyjanalnaja biełaruskaja ideja i nakolki jana važnaja ŭ epochu hłabalizacyi.
U dyskusii ŭziali ŭdzieł pradstaŭniki ŭładaŭ i apazicyi, siarod jakich byli Ryhor Kastusioŭ, Andrej Dźmitryjeŭ, Aleh Hajdukievič, rektar Akademii muzyki Kaciaryna Dułava, palitołah Vadzim Baravik, historyk Ihar Marzaluk, biźniesmien Alaksandr Knyrovič, deputat Dźmitryj Šaŭcoŭ, ekanamist Jarasłaŭ Ramančuk i inšyja.
U pracesie «pošuku» nacyjanalnaj idei viadučy Dźmitryj Bačkoŭ uzhadaŭ spartoŭca i muzyku Vitala Hurkova: jon byŭ zaprošany da ŭdziełu ŭ prahramie, ale nie zmoh pryjechać z-za hastrolaŭ hurtu Brutto. Viadučy zhadaŭ niadaŭniuju historyju z Hurkovym, kali toj pieramoh na čempijanacie śvietu pa muaj-taj i vyjšaŭ za miedalom u cišotcy z Pahoniaj i čyrvona-zialonym ściaham na plačach.
«I čamuści heta vyhladała absalutna arhanična», — zaŭvažaje viadučy.
Jaho padtrymlivaje Kaciaryna Dułava, rektar Akademii muzyki:
«…Nam kaštoŭnaje absalutna ŭsio, Dźmitryj. «Pahonia» tut, dziaržaŭny ściah tut — heta ž śviedčańnie taho, što čałaviek voś tak celna ŭsprymaje svaju historyju».