Nataša Potkina: Adzieńnie z nacyjanalnymi elemientami — sapraŭdny chit
Nataša Potkina — biełaruskaja dyzajnierka, jakaja vypuskaje dyzajnierskaje adzieńnie pad ułasnym brendam dla biznesvumen. U jaje apranajucca i znakamitaści, takija, jak Anžalika Ahurbaš, Palina Smołava, Hiuneš, Iskui Abalan, Nataša Padolskaja. Apošnija hady Nataša dapamahała stvareńniu vobrazaŭ dla ŭdzielnikaŭ nacyjanalnych adboraŭ jak dziciačaha, tak i darosłaha «Jeŭrabačańnia».
Ź niadaŭnich časoŭ Nataša — dyrektarka atelje, a taksama kramy tkaniny, skury, futra i nieabchodnych rečaŭ dla šyćcia, jakaja adkryłasia na vulicy Kalvaryjskaj u Minsku.
«Naša Niva» zavitała da Natašy ŭ hości.
Nataša Potkina: Atelje i krama pracujuć dzieści kala miesiaca, ale ŭračystaha adkryćcia pakul nie było. Kampanija «Dom fešn-tekstylu» była ŭtvoranaja paśla złučeńnia dźviuch firmaŭ — «Dom mod Natašy Potkinaj» i «Dyskaviery Markiet». Ja liču, što heta vielmi vyhadny sajuz, jaki pašyraje našy mahčymaści. Ciapier u nas jość supolnaje atelje, krama tkanin, aptovy skład i vytvorčaść.
Čamu atelje? Usio pačałosia z idei pryvozić u Biełaruś materyjały z Turcyi i inšych krain i adkryć kramu, dzie kožnaja žančyna znojdzie materyjał na svoj hust, a taksama i inšyja nieabchodnyja tavary. I pakolki ja dyzajnier adzieńnia i raźbirajusia ŭ vytvorčaści, to pry kramie vyrašyli adkryć atelje, dzie adrazu možna zamović i pašyć spadnicy ci niešta inšaje. Nie ŭsie žančyny, jakija cikaviacca dyzajnierskim adzieńniem, padychodziać pad standartny madelny pamier. A ŭ maim atelje ja prapanuju madel dla luboj fihury. Ja pracuju z žančynam, jakija lubiać indyvidualnaść, z artystami, publičnymi i tvorčymi piersonami. Taksama pracuju i z mužčynami. Asabista jany ŭ nas zamaŭlajuć viasielnyja kaściumy i kaściumy dla sceny.
Maim klijentam treba, kab ich adzieńnie było ŭnikalnym i niepaŭtornym. Maja zadača — zrabić im jakuju-niebudź sukienku, jakaja by ŭvasablała ich vobraz, pieśniu, tvorčy numar.
NN: Jak vyhladaje praces padborki tkanin i raspracoŭki dyzajnu?
NP: Zvyčajna ja sustrakaju klijentaŭ sama. My razam abmiarkoŭvajem, što čałavieku nieabchodna, što jamu padychodzić, ja sa svajho boku daju rekamiendacyi. Paśla my abirajem tkaninu, bo dziela hetaha ideja stvareńnia hetaha atielje i źjaviłasia: časta ludzi prychodziać i nie viedajuć ci nie majuć času padbirać tkaniny. A byvaje i takoje, što ludzi nie mohuć zrazumieć, što im padychodzić, tamu kali pobač ja ci toj, chto ŭ hetym dobra raźbirajecca, to sprava našmat praściej idzie.
Paśla adboru tkanin my prydumlajem madel: u nas jość prymieračnaja, dzie my zdymajem mierki, prykładvajem dadatkovyja tkaniny, kali takija jość. Dla mianie vielmi važna, kab žančyna adčuvała siabie ŭ maim adzieńni kamfortna, kab ja dapamahła joj adkryć jaje stanoŭčyja baki, unutrany śviet. Samastojna heta zrabić ciažka. A z boku, dy prafiesijnym pohladam, heta časam nieabchodna rabić. Z klijentami my hutarym, pjom kavu, jany raspaviadajuć pra svoj ład žyćcia, i tady źjaŭlajecca naš tvor!
Čas pašyvu zaležyć ad składanaści, u siarednim heta ad troch da piaci tydniaŭ. Heta nie tamu, što doŭha šyjecca, a tamu, što šmat zamovaŭ. Jość i asablivyja klijenty, byvaje, što treba zrabić terminova, tady maje dziaŭčaty šyjuć pozna, ale za 5 dzion zrobiać. Heta składana, ale ja daražu imi i caniu ich usich.
NN: A ceny?
NP: Tak, časta pytajucca, čamu pašyŭ taki darahi, chacia tkaniny ŭ mianie, u paraŭnańni z kramami italjanskich tkanin u Minsku, niedarahija. Sprava ŭ tym, što ŭ lubym atelje za indyvidualnuju pracu treba płacić šmat, jak i mastaku za dobruju karcinu. Ja ŭžo adkazvała, što praces stvareńnia spadnicy – heta nie kanviejernaja praca. I jakaść takich tvoraŭ vielmi vysokaja.
Maje dziaŭčaty ŭ cechu viedajuć, što ad majho pohladu ni adna nitka nie schavajecca, bo ŭsio praviaraju asabista. Što tyčycca tkanin, to jość i kitajskija, ale jakasnyja, pa 190, 300 tysiač, a jość i italjanskija, dzie treba budzie addać 700 tysiač za mietr. Pašyŭ, viadomy, našmat daražejšy, ale ludzi zamaŭlajuć tarty na takija ž košty. Ale na tym ža viasielli tort źjaduć, a spadnicu možna budzie apranać i dalej. Košt zaležyć ad składanaści spadnicy. Pašyŭ zvyčajnaj kaktejlnaj sukienki budzie kaštavać kala 2,5 miljonaŭ. Ja liču, što heta nie doraha, bo za tyja ž hrošy ŭ niekatorych atelje možna tolki ŭ arendu sukienku ŭziać.
NN: A chto vašyja asnoŭnyja klijenty?
NP: Šmat klijentaŭ — heta biznesvumen, publičnyja žančyny, ale nie miedyjapiersony, jana prosta chodziać na pryjomy, sieminary, tamu im treba dobra vyhladać. Taksama heta artysty biełaruskaj estrady, ja ich «zoračkami» nazyvaju. Užo try hady pracuju ź dziciačymi kalektyvami, naprykład, Illa Vołkaŭ, jaki zaniaŭ 3-jaje miesca na «Jeŭrabačańni» ŭ 2013 hodzie ŭ Kijevie. U nacyjanalnym adbory ŭ minułym i pazaminułym hodzie dzieci ŭ maich kaściumach vystupali. Ja vielmi hanarusia tym, što ŭ maich uborach artysty atrymlivajuć najlepšyja zvańni.
NN: Jakija kolery, tkaniny, karystajucca popytam siońnia?
NP: Voś u mianie źjaviłasia ŭ prodažy taśma z arnamientam. Jana paŭtaraje biełaruski i słavianski arnamienty, tamu karystajecca vialikaj papularnaściu. Zamaŭlajuć roznyja tuniki, kašuli z hetaj taśmoj. Nie abaviazkova heta pavinna paŭtarać aŭtentyčny biełaruski kaścium, prosta z narodnymi elemientami. I heta sapraŭdy chit. Ja pamiataju, kali ja vystaviła fota ŭ fejsbuku, dzie byŭ prykład adzieńnia z arnamientam, to da mianie prosta pasypalisia zamovy z vykarystańniem hetaj taśmy.
U pryncypie, usio takoje biełaruskaje stała vielmi papularnym, i mnie heta pryjemna. I kali mnie zadali pytańnie, ci budu ja pracavać ź biełaruskimi vytvorcami tut – ja chaču pastupova dadavać usiakija ŭpryhožvańni siudy i chaču, kab jany byli biełaruskimi. Mnie chaciełasia b, kab biełaruskija majstry prychodzili i prapanoŭvali svaje dyzajnierskija vyraby. Ja z zadavalnieńniem ź imi by pasupracoŭničała. Što tyčycca tkanin, to ciapier, u śpioku, papularnaja bavoŭna, asabliva roznyja biełyja, sinija, zialonyja pałoski. Adnak moda jość moda, ale najhałoŭnaje – heta ŭłasny styl. I ja zaŭsiody imknusia dapamahčy znajści jaho kožnamu, chto pryjdzie da mianie.
NN: Čamu, pa-vašamu, biełaruskija vytvorcy nie robiać stylovaha i tannaha adzieńnia dla moładzi?
NP: Nielha skazać, što ŭ Minsku darahoje adzieńnie. U nas možna znajści adzieńnie na luby hust i pamier kašalka. Nie treba zabyvać, što ŭ nas niama vychadu da mora, i ŭsie tavary z Turcyi i Kitaja dasyłajucca nam darahim šlacham. U Biełarusi jość dobry dyzajn, ale mała dobrych svaich tkanin. Ale jość ža dasiažnaje adzieńnie — voś Mark Formelle robić dobryja rečy.
Treba zrazumieć, što ŭ toj ža «HUM» pryvoziać taki tavar, jaki padychodzić dla takich naviedvalnikaŭ. Tudy prychodziać nastaŭniki, bankaŭskija supracoŭniki, słužačyja. Im treba kaściumy, jaki apryjory nie mohuć mała kaštavać. A ŭ tym ža tureckim «DeFacto» džynsy, majki, sarafany, tamu tam i ceny nižejšyja.
NN: Ale čamu «HUM» zrabiŭ pryhožyja vitryny, a nie mohuć zrabić toje samaje ź biełaruskim adzieńniem?
NP: Na vitrynach usio adzieńnie toje, što pradajecca ŭ samoj kramie. Heta prablemy tych vytvorcaŭ i fabryk, jakija jaho robiać. Tyja fabryki nie raźvivajucca, dzie kiraŭnictva było vychavanaje ŭ saviecki čas, tamu ciapier im ciažka zrazumieć sučasny hust. Ale jość i paśpiachovyja brendy, naprykład Nelva, Devour, Alena Goreckaya. «Elema», vy sami bačycie, jak stała raści. Pastupova ŭsio naładzicca. Usio zaležyć ad nas samich.
A tyja pracujuć na starym abstalavańni, tamu i dyzajn u ich prosty i nie sučasny. Ale ich ža kuplajuć.
NN: Ale tolki staroje pakaleńnie…
NP: Dyk a što im treba? Kali vy chočacie prychodzić u kramu, dzie pradajecca adzieńnie dla starejšaha pakaleńnia, i chočacie bačyć moładzievaje adzieńnie, to čamu vy nie chodzicie tudy, dzie jaho niepasredna pradajuć?
NN: Ale ž paŭsiul u kramach ludziam prapanujuć kuplać biełaruskaje.
NP: Popyt naradžaje prapanovu. Časam mnie prapanoŭvali vielmi słabyja pracy, i ja aburałasia, što heta biezhustoŭna. Ale mnie kazali, što ŭ ich heta kuplajuć i im treba tolki heta. Ja baču tolki adzin vychad — kulturnaje raźvićcio. Jak tolki našyja siemji pačnuć pryvivać pačućcie hustu, to kramam pryjdziecca padładžvacca pad ich.
Top dyzajnieraŭ pa viersii Natalli Potkinaj:
- Kako Šanel
- Džon Haljana
- Alaksandr Makkuin
- Valancin Judaškin
Kamientary