Učora ŭviečary efir parvaŭ isłandski kamientatar, jaki zvarjacieŭ u kancoŭcy matča z Aŭstryjaj (2:1). Hetyja roliki napeŭna bačyli ŭžo ŭsie, ale vy naŭrad ci nie pažadajecie pierahledzieć:
Kamientatar akazaŭsia niaprostym. Heta 41-hadovy Hudmundur Bieniedyktsan, były forvard zbornaj Isłandyi.
Praktyčna ŭsiu karjeru jon pravioŭ na radzimie i niekalki razoŭ vyjhravaŭ čempijanat z «Rejkjavikam» i «Valuram». U 1990-ch Bieniedyktsan dvojčy sprabavaŭ vyrvacca za miažu, ale abiedźvie kamandziroŭki pralacieli biasśledna: za 4 hady ŭ ścipłych bielhijskich kamandach jon pravioŭ usiaho 20 matčaŭ i zabiŭ 4 hały.
U zbornaj Hudmundur taksama asabliva nie spatrebiŭsia, choć ŭsio pačynałasia vielmi navat kruta — z hoła ŭ matčy suprać AAE ŭ 1994-m. Bieniedyktsan jašče trochi pahulaŭ u adbory na ČS-1998 ale potym piać hadoŭ sumavaŭ biez telefanavańniaŭ ad trenieraŭ. Apošni matč za Isłandyju jon pravioŭ u 2001 hodzie (u sumie — 10 matčaŭ za zbornuju i 2 hały), a karjeru skončyŭ tolki ŭ 2009-m. Adrazu paśla hetaha Hudmundur pieraklučyŭsia na trenierskuju pracu i kamientavańnie matčaŭ — tut vielmi spatrebiŭsia jarki psieŭdanim Humi Ben, jaki jon prydumaŭ sam.
Bieniedyktsan niadrenna sumiaščaje pracu ŭ kłubie i na telebačańni, ale ŭ kamientavańni jon pakul bolš paśpiachovy. Znakamity «Rejkjavik», dzie jon pracuje asistentam, idzie tolki na vośmym miescy ŭ čempijanacie Isłandyi, a na telebačańni jon sapraŭdnaja zorka. Na Jeŭra-2016 Hudmundur u adzinočku viadzie repartažy z matčaŭ zbornaj.
Samaje śmiešnaje, što paśla ŭčorašniaha pierfomansu Bieniedyktsanu treba terminova imčacca dadomu: siońnia ŭ jaho «Rejkjavika» hulnia čempijanatu suprać «Akraniesa». U Francyju jon vierniecca da 1/8 finału, dzie Isłandyja budzie badacca z Anhlijaj.
«Telefon prosta nie zmaŭkaje. Heta adzinaje, što źmianiłasia ŭ maim žyćci paśla taho repartaža, — skazaŭ Hudmundur siońnia ranicaj isłandskamu radyjo. — Ja daŭ intervju BBC, ale nie hatovy adkazvać na kožnaje telefanavańnie z usich krain zapar. Ja prosta chaču spakojna dabracca da doma».
Kali Bieniedyktsana paprasili apisać pačućci paśla druhoha hoła Isłandyi, jon spačatku nie moh padabrać słovy.
«Ja prosta zhubiŭ hałavu.
Arhanizm jak byccam pačaŭ pracavać sa zbojami. Heta byŭ adzin z tych momantaŭ, kali ty naohuł siabie nie kantraluješ. Heta značyć ja čuŭ siabie, razumieŭ, što kažu, što heta moj hołas, ale ja ŭvohule nie ŭśviedamlaŭ, što mienavita ja kažu. Heta było varjactva.
Ja maryŭ pra taki momant z samaha dziacinstva, ale pa chodzie majoj karjery Isłandyja navat nie była blizkaja da vychadu ŭ finalnuju častku Jeŭra abo čempijanatu śvietu. A ciapier ja baču, jak ŭvasablajecca mara, pražyvaju hetyja imhnieńni jak kamientatar. Taksama niadrenna».
Vam napeŭna cikava, što ž takoje kryčaŭ Hudmundur. Dobryja isłandcy pieraviali hety pałymiany manałoh.
«Tam kuča volnaj prastory! Teador Elmar (Bjarnasan) adzin u hetaj častcy polai! Jany vybiahajuć try ŭ dva! Emi! Biažy ŭ štrafnuju! Emi!
Ahhh … Yes … Yes … Yes … YES … YES … Jarghaah … My vyjhrajem! My vychodzim u 1/8 finału! My prabivajemsia ŭ płej-of! My abyhryvajem Aŭstryju!
Hołas prosta źnik! Ale jakaja roźnica?! My vyjšli! Arnar Traustasan zabiŭ, Isłandyja — dva, Aŭstryja — adzin!
Što tam?! Prahučaŭ finalny śvistok! Nikoli, nikoli jašče ja nie adčuvaŭ siabie tak vydatna! Arnar Traustasan prynios nam pieršuju pieramohu! Nikoli nie zdavacca, nikoli nie prajhrajem! Pieršaja pieramoha - heta ŭžo fakt. Isłandyja — dva, Aŭstryja — adzin! Dziakuj, što pryjšli, Aŭstryja! Dziakuj, što pryjšli!»
Humi Ben vykanaŭ padobnaje nie ŭ pieršy raz. Voś jak jon prakamientavaŭ niezabyŭny čempijonski hoł Sierchia Ahuera.
Ale i heta jašče nie ŭsio. U kamientatara i treniera Bieniedyktsana jość 19-hadovy syn Albiert, jaki ciapier hulaje ŭ maładziožnaj kamandzie PSV.
U Albierta cudoŭnyja hieny: mama vystupała za žanočuju zbornuju, dziadula pa matčynaj linii byŭ viadomym forvardam,
a pradzied Albiert Hudmundsan hulaŭ za «Miłan» i «Arsienał», byŭ pieršym prafiesijnym futbalistam u historyi Isłandyi, a potym pracavaŭ ministram finansaŭ
