Maładyja ludzi, jakija pratestujuć suprać novaha Pracoŭnaha kodeksa la budynka ŭrada ŭ Vilni — pradstaŭniki novaha pakaleńnia, heta pakaleńnie levych, na jakich nie ciśnie savieckaja spadčyna, heta pakaleńnie ŭžo źjaviłasia ŭ Litvie, i jano nie maje ničoha ahulnaha z prarasijskimi siłami, skazaŭ prafiesar univiersiteta im. Vitaŭta Vialikaha Hintaŭtas Mažejkis.
Tut i nižej fota: Delfi
Pa słovach prafiesara, mienavita takaja ciapier moładź, pieravažna studenty, doktary navuk, jakija za tydzień da pryniaćcia PK pratestavali ŭ Kaŭnasie, u Haradskim parku, a ciapier pryjechali ŭ Vilniu — da budynka ŭrada.
«Hety, u pieršuju čarhu studencki pratest, pačaŭsia jak z-za ahulnaj jakaści žyćcia — rostu cen i niedachopu demakratyčnaj dyskusii, ale i maje peŭnyja fiłasofskija pieradumovy — krytyka nealiberalizmu. Nealiberalizm — heta kali rynak ci bujnyja karparacyi abjadnoŭvajucca ź dziaržaŭnym aparatam, tady roznyja zakony prymajucca na karyść hetych karparacyj», — skazaŭ Mažejkis.
Pavodle jaho słoŭ, pratestoŭcy zapeŭnivajuć, što PK «nie na karyść moładzi (…), jon u pieršuju čarhu pryniasie karyść bujnym kampanijam, jakim budzie lahčej pryniać i zvolnić z pracy, pavialičyć kolkaść pracoŭnych hadzin, skaracić praciahłaść adpačynkaŭ».
«Levyja studenckija hrupy ŭdzielničali ŭ roznaj dziejnaści prafsajuzaŭ ci mieli znosiny ź imi i tam sfarmavali svaje pohlady i mierkavańnie. Ja dumaju, patrabavańni hetych studentaŭ zbolšaha abhruntavanyja, i heta ni ŭ jakim razie nie stalejučaja, heta užo stałaja demakratyja — toje, jak jany mohuć vykazvać svajo mierkavańnie i pratestavać, niahledziačy na pastajanny cisk z boku pravaachovy, a nie pieramovy», — skazaŭ prafiesar.
Na dumku navukoŭca, takoje žorstkaje «pravavoje staŭleńnie zamiest pieramovaŭ, pakazvaje, što instrumienty vyrašeńnia prablem zanadta słabyja». «Palityčnyja rašeńni sprabujuć zamianić administracyjnymi, tut my nazirajem kanflikt», — adznačyŭ Mažejkis. Pavodle jaho słoŭ, arhumient, što moładź vyjšła pratestavać «post factum», nie abhruntavany, pakolki pratesty ŭžo tydzień prachodzili ŭ Kaŭnasie, «tolki ich nichto nie bačyŭ i nie čuŭ».
«Akcyja ŭ Kaŭnasie prachodziła ŭ znak salidarnaści z akcyjaj u Vilni, mierkavali, što pratestavać buduć prafsajuzy ci niejkija inšyja hrupy, pakolki asnoŭnaha dziejstva tak i nie adbyłosia, my bačym hety» post factum», — skazaŭ Mažejkis. Jon nie ličyć, što hramadstva śpić.
«U častki hramadstva jość prava zhadžacca na taki PK i navat aktyŭna padtrymlivać jaho, vykazvać svaje arhumienty, adnak kali zirnuć na toje, što adbyvajecca ŭ inšych krainach, kali prymajuć padobnyja PK, da prykładu, jak ciapier u Francyi, dyk pieramovy tam vielmi zaŭziatyja. Niesumnienna, što hety PK dapamahaje adnym hrupam pracujučych, a mahčymaści i pravy inšych skoŭvaje, voś nie było pratestu z boku tych, kaho heta zakranie admoŭna. Jany nie vykazvajucca, nie mohuć ci nie chočuć vykazvać svajo hramadzianskaje mierkavańnie», — skazaŭ Mažejkis.
Pavodle jaho słoŭ, heta aznačaje, što ŭ hetuju dyskusiju ŭciahnutaje nie ŭsio hramadstva. «Toje, što hramadzianskuju dyskusiju arhanizujuć nie palityčnyja partyi, a hramadskija, u pieršuju čarhu, moładzievyja ruchi, heta paradoks i prykmieta siońniašniaha dnia. Hety PK stvaraŭsia tak, kab moładzi było lepš, i mienavita moładź (…) i krytykuje PK i sposab jaho pryniaćcia. A voś, kab dyskutavali z hetaj moładździu, hetaha ja nie baču. Ich hruba adšturchvajuć i kažuć, nie ŭmiešvajciesia, nie ŭdzielničali da hetaha, ciapier paśla ŭsiaho z vami niama čaho razmaŭlać (…), i hetaja chałodnaść tolki dapaŭniaje kanflikt», — skazaŭ Mažejkis.
Navukoviec adznačyŭ, što hetaja moładź nie prarasijskaja, jak časam dumajuć. «Da abjadnańniaŭ levaha tołku doŭha stavilisia jak da mahčymaj ruki Maskvy. Ale heta vialikaja iluzija. Kreml ničoha nie maje ahulnaha ź levymi, heta ŭłada pravych aliharchaŭ, jakija sami nazyvajuć siabie novym kansiervatyŭnym rucham. Ničoha ahulnaha ni z kamunizmam, ni z sacyjalizmam u hetaj maskoŭskaj kramloŭskaj ułady niama», — skazaŭ jon. Pavodle jaho słoŭ, heta pieršaje pakaleńnie, zusim svabodnaje i niezaležnaje ad byłych stereatypaŭ Kampartyi, ad Partyi pracy i inšych sacyjalistyčnych ujaŭleńniaŭ.
